Fələstinli Məhbuslar Klubu fələstinli diplomat Mərvan Barqutinin İsrail həbsxanasında döyüldüyünü açıqlayıb. Bu barədə məlumat qurumun rəsmi ‘’Telegram’’ kanalında yayımlanan bəyanatda yer alıb.

Bәyanatda bildirilir ki, Barquti döyüldükdən sonra huşunu itirib və nəticədə dörd qabırğası sınıb.

66 yaşlı Mərvan Barquti Fələstin prezidenti Mahmud Abbasın rəhbərlik etdiyi ‘‘Fəth’’ hərəkatının üzvüdür və Fələstin siyasətində ən tanınmış simalardan biri hesab olunur. O, 2002-ci ildən İsrail tərəfindən ömürlük həbs cəzasına məhkum edilib.

Xatırladaq ki, ABŞ prezidenti Donald Tramp İsrail və ‘‘Həmas’’ arasında sentyabrın 29-da açıqlanan planın birinci mərhələsi üzrə razılıq əldə olunduğunu bildirmişdi. Plana Qəzzada atəşkəsin təmin olunması, fələstinli məhbusların azad olunması müqabilində bütün israilli əsirlərin sərbəst buraxılması və İsrail qüvvələrinin Qəzzadan tədricən çıxarılması daxildir.

Sözügedən planın birinci mərhələsi ötən həftə, cümə günü qüvvəyə minib.

Planın ikinci mərhələsi isə Qəzzada ‘‘Həmas’’ın iştirakı olmadan yeni bir idarəetmə orqanının formalaşdırılmasını, çoxmillətli sülhməramlı qüvvələrin yerləşdirilməsini və ‘‘Həmas’’ın silahlarını tam şəkildə təhvil verilməsini nəzərdə tutur.

İsrailin 2023-cü ilin oktyabrından bəri davam edən hücumları nəticəsində əksəriyyəti qadın və uşaqlar olmaqla, təxminən 68 min fələstinli həyatını itirib.