Sərhəd bölgəsində şiddətli qarşıdurmalar onlarla insanın həlakına və Əfqanıstana yük daşıyan yük maşınlarının qapalı vəziyyətdə qalmasına səbəb olub.
Pakistan və Əfqanıstan arasında həftə sonu onlarla insanın ölümünə səbəb olan şiddətli toqquşmalardan sonra Pakistan ordusu bu gün (13 oktyabr 2025) Əfqanıstan sərhədi boyunca yüksək döyüş hazırlığı vəziyyətinə gətirilib. Toqquşmalar ABŞ prezidenti Donald Trampın diqqətini çəkib və o, münaqişənin sona çatmasına kömək edəcəyini bildirib.
Pakistanlı sənaye nümayəndələrindən biri bildirib ki, Pakistan 2600 kilometrlik sərhəd boyunca keçidləri bağladıqdan sonra qonşular arasında sərhəd ticarəti dayandırılıb, hər iki tərəfdə yük maşınları dayanıb.
Taliban 2021-ci ildə Kabildə hakimiyyətə qayıtdıqdan sonra qonşular arasında baş verən ən qanlı toqquşmada oktyabrın 11-i gecəsi onlarla Taliban üzvü öldürülüb.
Vaxtilə müttəfiq olan iki tərəf arasında gərginlik İslamabadın Talibandan Pakistanda hücumları artıran terrorçulara qarşı tədbir görməsini tələb etməsindən sonra yaranıb. Pakistan bu terrorçuların Əfqanıstandakı sığınacaq yerlərində fəaliyyət göstərdiyini iddia edir.
Taliban öz ərazisində Təhrik-i-Taliban-i-Pakistan (TTP) terrorçularının olduğunu inkar edir. TTP hərbi və mülki hədəflərə edilən ən ölümcül hücumlardan bəzilərinə görə məsuliyyət daşıyan qadağan edilmiş bir təşkilatdır. Dağlıq sərhədin məsaməli olması TTP-nin rahat işləməsinə şərait yaradır.
Ticarət dayandırılıb, terror davam edir
Əfqanıstan Müdafiə Nazirliyinin sözçüsü Enayatullah Xovarazmi "Reuters" agentliyinə bildirib ki, sərhəddəki "cari vəziyyət" normaldır, lakin ətraflı məlumat verməyib.
Pakistan hökumətinin yüksək rütbəli rəsmisinin sözlərinə görə, Pakistanın ticarət və digər inzibati məsələlərlə məşğul olan bütün dövlət idarələri bağlanıb, çünki nəqliyyat vasitələri və piyadalar üçün sərhəd keçidləri bağlanıb.
Pak-Əfqanıstan Birgə Ticarət və Sənaye Palatasının vitse-prezidenti Zia Ul Haq Sərhadi "Yük maşınları, konteynerlər və ağır yük maşınları sərhədin hər iki tərəfində ilişib qalıb. Onlar təzə meyvə və tərəvəz, eləcə də idxal, ixrac və tranzit malları daşıyır, bu da hər iki ölkəyə milyonlarla rupi və ticarətçilərin itkisinə səbəb olur" deyib.
Pakistan dənizə çıxışı olmayan və yoxsul Əfqanıstan üçün əsas mal və ərzaq təchizatı mənbəyidir.
Qarşıdurmalar Trampın da diqqətini çəkib. Oktyabrın 12-də Vaşinqtondan İsrailə yola düşən ABŞ prezidenti jurnalistlərə açıqlamasında "Pakistan və Əfqanıstan arasında müharibə olduğunu eşidirəm" deyib və tezliklə məsələyə toxunacağını qeyd edib.
Tramp çıxışında "Mən dedim ki, geri qayıdana qədər gözləməli olacam. Bilirsiniz, mən başqa işlə məşğulam, çünki müharibələri həll etməyi, sülhü bərqərar etməyi yaxşı bacarıram" deyib.
Pakistan ordusu həftəsonu toqquşmalarda 23 əsgərinin öldüyünü, Taliban isə 9 əsgərinin öldüyünü açıqlayıb. Hər iki tərəf bir-birinə daha çox itki verdiyini iddia edir, lakin bu iddiaları təsdiqləyən sübut təqdim etməyib.
Pakistan 200-dən çox əfqan talibanını və müttəfiq döyüşçülərini öldürdüyünü, Əfqanıstan isə 58 pakistanlı əsgəri öldürdüyünü iddia edir. Taliban oktyabrın 12-də Qətər və Səudiyyə Ərəbistanının çağırışlarından sonra hücumlarını dayandırdığını açıqlayıb.
