Prezident Rəcəb Tayyib Ərdoğan Suriyada sabitliyə və sülhə çağırış edərək, bütün tərəfləri birliyə üstünlük verməyə və davamlı sülh ümidlərini təhlükəyə atan hərəkətlərdən çəkinməyə çağırıb.

Ədalət və İnkişaf Partiyasının Ankarada keçirilən parlament qrup iclasında çıxış edən Ərdoğan deyib: "Suriya üçün ən böyük arzumuz sabitliyə və sülhə nail olmaqdır. Suriyalıların gələcəklərini birlikdə vəhdət içində qurmalarını istəyirik".

İllərdir davam edən münaqişədən sonra ölkənin müxtəlif təbəqələri arasında əməkdaşlığın vacibliyini vurğulayan Ərdoğan uzunmüddətli həll üçün çərçivənin aydınlaşdığını və tərəfləri keçmiş səhvləri təkrarlamaqdan çəkinməyə çağırıb.

Dövlət başçısı deyib: "Davamlı sülh üçün yol xəritəsi müəyyən edilib. Tərəflər səhv hesablamalardan, keçmiş səhvləri təkrarlamaqdan və prosesi maksimalist tələblərlə zəhərləməkdən çəkinməlidirlər. Ərəb, türkmən, kürd və ya ələvi olmasından asılı olmayaraq tökülən hər damla qan ürəyimizi yandırır. Suriyada itirilən hər bir həyat özümüzün bir hissəsini itirmək kimidir".

Ərdoğan həmçinin yenidənqurma və iqtisadi bərpa prosesinin zəruri olduğunu bildirib.

“Suriyanın yerüstü və yeraltı sərvətlərindən şəhərlərin altında tunel qazmaq üçün deyil, cəmiyyətin bütün təbəqələrinin rifahı üçün istifadə etməyin vaxtıdır”, -deyə dövlət başçısı qeyd edib.

Regional narahatlıqlara toxunan Ərdoğan Türkiyənin dominantlıq axtardığı iddialarını rədd edərək dedi: “Türkiyə regionda təsir axtarmır və digər ölkələri formalaşdırmaq istəmir; əksinə, biz səmimi şəkildə qardaşlıq axtarışındayıq”.