İspaniyanın Baş naziri Pedro Sançes bildirib ki, ölkəsi Ukraynaya qoşun göndərməyə hazır olduğu kimi, “fürsət yaranacağı təqdirdə” sülhməramlı missiya çərçivəsində Fələstinə də hərbi qüvvə göndərməyə hazırdır.
Pedro Sançes Madriddə İspaniya səfirləri ilə keçirilən görüşdə deyib ki, imkan yarandığı halda Fələstinə sülhməramlı qüvvə göndərilməsi məsələsini parlamentin müzakirəsinə çıxaracaq. Baş nazir deyib:“Fürsət yaranarsa və bu sülhməramlı missiyanın necə həyata keçirilə biləcəyini görsək, parlamentə Fələstinə sülhməramlı qüvvə göndərməyi təklif edəcəyəm. Biz Fələstini və Qəzza zolağını unutmamışıq. İspaniya Fələstində ümidin bərpasında fəal rol oynamalıdır. Oradakı vəziyyət hələ də qəbuledilməzdir.”
Sançes eyni zamanda qeyd edib ki, sülh sazişi imzalanacağı halda İspaniya Ukraynaya qoşun göndərməyə hazırdır.
Rusiya Prezidenti Vladimir Putin Ukrayna ərazisində hər hansı xarici sülhməramlı qüvvənin yerləşdirilməsinə qarşı olduğunu bəyan edib.
Qeyd edək ki, 2024-cü ildə Fələstin dövlətini tanıyan İspaniya hökuməti İsrailin Qəzza zolağına qarşı hərbi əməliyyatlarını Avropada ən sərt tənqid edən ölkələrdən biri olub.
Ötən ilin sonunda Pedro Sançes Madriddə Fələstin dövlət başçısı Mahmud Abbasla görüşündə beynəlxalq ictimaiyyəti fələstinlilərin “dramatik vəziyyəti” barədə daha məlumatlı olmağa çağırıb.
