Türkiyə, Misir, Pakistan və Səudiyyə Ərəbistanı Yəməndəki husilərin Səudiyyə Ərəbistanına qarşı bütün hücumlarına reaksiya verərək ölkənin suverenliyinə, ərazi bütövlüyünə və təhlükəsizliyinə sarsılmaz dəstəklərini bir daha bəyan ediblər.
Türkiyə Xarici İşlər Nazirliyi tərəfindən Türkiyə-Misir-Pakistan-Səudiyyə Ərəbistanı Xarici İşlər Nazirlərinin 6-cı İclasına dair yayımlanan birgə bəyanata əsasən Türkiyə, Misir, Pakistan və Səudiyyə Ərəbistanı xarici işlər nazirləri Birləşmiş Millətlər Təşkilatının (BMT) 81-ci Baş Assambleyası çərçivəsində Nyu-Yorkda bir araya gəliblər.
İclas gündəmdəki regional və beynəlxalq proseslərlə bağlı fikir mübadiləsi aparılmasına imkan yaradıb.
Nazirlər Yaxın Şərqdə və daha geniş regionda sülh, təhlükəsizlik, sabitlik və rifahın dəstəklənməsi məqsədilə 4 ölkə arasında məsləhətləşmə və koordinasiyanın davam etdirilməsinin vacibliyini təsdiqləyiblər.
Regionda davam edən gərginlik və münaqişələrdən dərin narahatlıqlarını ifadə edən nazirlər dialoq və diplomatiyanın davamlı həllə nail olunmasının yeganə yolu olduğunu vurğulayaraq, bu çərçivədə daimi sülh və sabitliyin bərqərar edilməsi məqsədilə "Islamabad Razılaşması"na əməl olunmasının vacibliyini diqqətə çatdırıblar.
4 ölkə husilərin Səudiyyə Ərəbistanına hücumlarını pisləyib
Nazirlər Yəməndəki husilərin son günlərdəki hücumları da daxil olmaqla, Səudiyyə Ərəbistanına yönəlmiş bütün hücumları sərt dillə pisləyərək Səudiyyə Ərəbistanının suverenliyinə, ərazi bütövlüyünə və təhlükəsizliyinə sarsılmaz dəstəklərini bir daha dilə gətiriblər.
Səudiyyə Ərəbistanının beynəlxalq hüquq və Birləşmiş Millətlər Təşkilatının Nizamnaməsinə uyğun olaraq özünü, ərazisini və xalqını qorumaq məqsədilə özünümüdafiə hüququnu təsdiqləyən nazirlər dənizlərdə gəmiçilik təhlükəsizliyinin və azadlığının qorunmasının vacibliyini vurğulayıblar.
Nazirlər Yəmənin qanuni hökumətinin və Yəmən Rəyasət Heyəti Şurasının siyasi proses və müxtəlif tərəflərin iştirak edəcəyi əhatəli Yəmən tərəfdarı dialoq yolu ilə Yəməndə təhlükəsizlik, sabitlik və inkişafın təmin olunmasına yönəlmiş səylərinə sarsılmaz dəstəklərini ifadə ediblər.
Fələstin məsələsinin Yaxın Şərqdə sülh, təhlükəsizlik və sabitliyin təmin olunmasındakı mərkəzi əhəmiyyətini bir daha təsdiqləyən nazirlər BMT Təhlükəsizlik Şurasının müvafiq qətnamələrinə uyğun olaraq, paytaxtı Şərqi Qüds olan, 4 iyun 1967-ci il sərhədləri əsasında müstəqil, suveren, davamlı və coğrafi bütövlüyə malik Fələstin Dövlətinin qurulması və öz müqəddəratını təyin etmək hüququ da daxil olmaqla, Fələstin xalqının qanuni hüquqlarına dəstəklərini bildiriblər.
Sudanda birliyi zəiflədən paralel təşkilatlanmalar rədd edilməlidir
Nazirlər Sudanın suverenliyi, birliyi, müstəqilliyi və ərazi bütövlüyünə sarsılmaz dəstəklərini təsdiqləyərək qanuni milli təşkilatlarının qorunmasının və Sudanın suverenliyini, birliyini zəiflədən paralel qurumların rədd edilməsinin vacibliyini vurğulayıblar.
Sudan ərazisinə qanunsuz silah, muzdlu əsgər və xarici döyüşçü axınının dayandırılmasının zəruriliyinə diqqət çəkən nazirlər kollektiv təhlükəsizliyin möhkəmləndirilməsi və uzunmüddətli regional sabitliyin dəstəklənməsi məqsədilə regional, beynəlxalq proseslərlə bağlı sıx koordinasiyanı və məsləhətləşmələri davam etdirmək barədə razılığa gəliblər.
