“Global Times” tərəfindən yayımlanan xəbərə görə, Pekin rəhbərliyi ABŞ prezidenti Donald Trampın Çinə qarşı yeni gömrük rüsumları və ixrac məhdudiyyətləri tətbiq edəcəyi barədə təhdidindən sonra oktyabrın 12-də (bu gün) açıqlama verib. Çin hökuməti bildirib ki, rəsmi Pekin ABŞ-la ticarət müharibəsindən qorxmur.
Çin Xalq Respublikası (ÇXR) Ticarət Nazirliyinin sözçüsü bəyan edib ki, “yüksək tariflərlə bağlı əsassız təhdidlər” Çinlə qarşılıqlı əlaqə qurmağın düzgün yolu deyil. O, rəsmi Pekinin bu mövzudakı mövqeyinin dəyişməz olduğunu xüsusi vurğulayıb.
ÇXR rəsmisi əlavə edib: “Biz ticarət müharibəsi istəmirik, ancaq bundan da qorxmuruq. Çin dövləti milli və beynəlxalq təhlükəsizliyini qətiyyətlə qoruyur, ədalətli və məntiqli prinsiplərə əsaslanan mövqeyini nümayiş etdirir və ixrac nəzarəti tədbirlərini diqqətli və ölçülü şəkildə tətbiq edir.”
D.Trampın yeni tarifləri
Qeyd edək ki, Çinin bu açıqlamaları ABŞ prezidenti Donald Trampın oktyabrın 10-da verdiyi bəyanatdan sonra səsləndirilib. Belə ki, D.Tramp 2025-ci il noyabrın 1-dən etibarən və ya rəsmi Pekinin əlavə addımlar atacağı təqdirdə Çindən idxal olunan mallara 100 faiz yeni gömrük rüsumu tətbiq ediləcəyini bildirmişdi. Eyni zamanda “kritik proqram təminatlarının” ixracına da məhdudiyyət qoyulacağını elan etmişdi.
D.Tramp bu qərarı sosial media platforması “Truth Social” üzərindən açıqlayaraq, Çinin nadir torpaq elementlərinin ixracına yönəlik məhdudiyyətləri sərtləşdirməsi istiqamətində atdığı addıma cavab olaraq qəbul etdiyini bildirdi.
Xatırladaq ki, Çin ötən həftə oktyabrın 9-da nadir torpaq elementlərinin ixrac məhdudiyyətlərini genişləndirərək, bu məhdudiyyətləri emal və istehsal texnologiyalarını, həmçinin xarici şirkətlərlə əməkdaşlığı da əhatə edəcək şəkildə təsdiqləmişdi. Bu qərara əsasən, hökumətin əvvəlcədən təsdiqi olmadan bu sahələrdə fəaliyyət göstərmək mümkün olmayacaq.
Çin Ticarət Nazirliyi açıqlamasında bildirib ki, bu tədbirlərin məqsədi nadir torpaq elementləri ilə bağlı texnologiyaların, o cümlədən mədənçilik, əridilmə, ayrışdırma və təkrar emal proseslərinin ixracını tənzimləmək və bununla da milli təhlükəsizliyi qorumaqdır.
