Türkiyə Prezidenti Rəcəb Tayyib Ərdoğan Avropa Komissiyasının prezidenti Ursula fon der Leyen ilə telefon danışığı aparıb.
Bu barədə Türkiyə Prezidenti Administrasiyasının İctimaiyyətlə Əlaqələr İdarəsinin yaydığı məlumatda bildirilib. Telefon danışığı zamanı İrana qarşı həyata keçirilən hücumlar və bölgədə artan gərginlik müzakirə olunub.
Məlumata görə, Rəcəb Tayyib Ərdoğan bütün tərəfləri hərbi qarşıdurmanı dayandıraraq diplomatiya və danışıqlar masasına qayıtmağa çağırıb. O, Türkiyənin sülh prosesinin bərpası üçün hər növ dəstəyi verməyə hazır olduğunu və böhranın həlli istiqamətində Türkiyə ilə Avropa İttifaqı arasında sıx koordinasiyanın saxlanılmasının vacibliyini qeyd edib.
Xatırladaq ki, fevralın 28-də ABŞ və İsrail İrana hücum təşkil edib, nəticədə ölkənin ali dini lideri Ayətullah Əli Xamenei də daxil olmaqla bir neçə yüksək vəzifəli rəsmi həyatını itirib. Tehran administrasiyası bu hücumlara cavab olaraq İsrail, ABŞ aktivlərini və bəzi Körfəz ölkələrini hədəf alıb.
Qeyd edək ki, bənzər gərginlik ötən ilin iyun ayında da baş vermişdi.
