Təhlükəsizlik mənbələrinin məlumatına görə, Türkiyənin Milli Kəşfiyyat Təşkilatının (MİT) rəhbəri İbrahim Kalın İstanbulda Fələstin müqavimət hərəkatı “Həmas”ın nümayəndə heyəti ilə bir araya gəlib. Yanvarın 24-də baş tutan görüşdə İ.Kalın “Həmas” Siyasi Büro üzvü və danışıqlar heyətinin rəhbəri Xəlil əl-Həyyə ilə bir araya gəlib.

Təmaslar zamanı ikinci mərhələsinə keçən Qəzza atəşkəs razılaşması müzakirə edilib. Tərəflər humanitar yardımların artırılması, Rəfah Sərhəd Keçid Məntəqəsinin iki istiqamətli açılması, Qəzza Milli İdarəetmə Komitəsinin fəaliyyətə başlaması və digər əlaqədar məsələlər üzrə koordinasiyalı şəkildə çalışılması barədə razılığa gəliblər.

Görüş zamanı “Həmas” nümayəndə heyəti Qəzzada sülhün təmin olunmasına yönəlmiş səylərdə Türkiyənin vasitəçi və təminatçı rolu, eləcə də planın ikinci mərhələsində rəsmi Ankaranın getdikcə artan töhfələrinə görə Türkiyə Respublikasının Prezidenti Rəcəb Tayyib Ərdoğana təşəkkürlərini çatdırıb.

Xatırladaq ki, 2023-cü ilin oktyabr ayından bu yana Qəzzaya qarşı törədilən hücumlar nəticəsində, əksəriyyəti qadın və uşaqlar olmaqla, 71 mindən çox insan həyatını itirib, 171 mindən artıq şəxs yaralanıb. Qəzza Səhiyyə Nazirliyinin məlumatına görə, oktyabrın 10-da başlayan atəşkəsə baxmayaraq hücumlar davam edib və bu müddət ərzində 481 fələstinli öldürülüb, 1.313 nəfər yaralanıb.