Fələstin nümayəndə heyəti Fələstin dövlətinin tanınmasına dəstək verən ölkələrin sayını artırmaq məqsədilə Avropaya səfər edib. Oktyabrın 15-də İsveçrəyə səfər edən Fələstin dövlət başçısının xüsusi nümayəndəsi bildirib ki, Fələstin Administrasiyasının təmsilçiləri hələ Fələstini tanımayan ölkələri razı salmaq üçün Avropada diplomatik görüşlər keçirirlər.
Fələstinin keçmiş baş naziri və hazırda dövlәt başçısı Mahmud Abbasın xüsusi nümayəndəsi olan Məhəmməd Ştayye isveçrəli diplomatlarla görüşdüyünü və rəsmi Berni “Fələstini tanıyan ölkələr sırasına qoşulmağa” təşviq etdiyini bildirib.
Ştayye həmçinin eyni mesajı çatdırmaq üçün yaxın günlərdə Hollandiya və Avstriyaya da səfər edəcəyini deyib. BMT-nin müxbirlər assosiasiyası ACANU tərəfindən təşkil edilən brifinqdə çıxış edən Ştayye deyib:
“Daha bir nümayəndə heyəti Baltikyanı ölkələrə səfər edəcək. Ümid edirik ki, dövlәt başçımız İtaliya və Almaniyaya da səfər edəcək.”
Avstraliya və Kanada kimi bəzi qeyri-Avropa ölkələrinin Fələstini tanımaq qərarı İsrailin kəskin tənqidlərinə səbəb olsa da, bu addım beynəlxalq aləmdə Fələstin dövlətinə artan dəstəyin göstəricisi kimi qiymətləndirilir.
“Fələstini hələ də tanımayan 34 ölkə var. Biz həmin ölkələrlə əlaqə saxlayırıq və onları bu sıraya qoşulmağa təşviq etməyə çalışırıq,” – deyə Məhəmməd Ştayye qeyd edib.
İsveçrə xarici işlər naziri İqnazio Kassis ilə görüşdüyünü bildirən Ştayye deyib:
“Mesajım çox aydındır: İsveçrə BMT agentliklərinə ev sahibliyi edir və Cenevrə Konvensiyalarının qoruyucusudur. Mən İsveçrə hökumətini digər ölkələr kimi Fələstini bir dövlət olaraq tanımağa dəvət etdim.”
İsveçrədə bəzi ictimai qruplar da Fələstinin tanınması üçün təzyiq göstərirlər. Bu məqsədlə vətəndaş cəmiyyəti təşkilatları, QHT-lər və siyasətçilərdən ibarət bir koalisiya ölkənin birbaşa demokratiya sistemi çərçivəsində referendum keçirilməsi üçün bu həftə imza toplama kampaniyasına başlayıb.
