İsrail hərbi hava qüvvələrinin Livanın cənubundakı bir neçə əraziyə zərbələr endirməsi nəticəsində çoxlu sayda insan yaralanıb. Hücumlar İsrailin müdafiə naziri İsrael Katzın ordunun Livan, Suriya və Qəzzada işğal olunmuş ərazilərdən çıxarılmayacağını bəyan etməsi ilə eyni vaxta təsadüf edib.
Bu addımlar beynəlxalq birliyin İsrailin işğal olunmuş ərazilərdəki hərbi iştirakına son qoyması ilə bağlı çağırışları fonunda baş verir. Zərbələr İsrail qoşunlarının Livan ərazisindən tədricən çıxarılmasını nəzərdə tutan Beyrut razılaşmasının növbəti dəfə pozulması deməkdir.
Livanın milli xəbər agentliyi NNA-nın məlumatına görə, İsrailə məxsus pilotsuz uçuş aparatı (PUA) Bint-Cbeyl rayonunun Kfar kəndi yaxınlığındakı avtomobil yolunu vurub, nəticədə dinc sakinlər xəsarət alıb. Agentlik, həmçinin İsrail qüvvələrinin Mərcayun rayonundakı Deyr-Sirian kəndi yaxınlığına hava zərbəsi endirdiyini və Tulin vadisindən keçən Vadi-Saluki yolunda güclü partlayışların qeydə alındığını bildirib.
Katz işğalı davam etdirəcəklərinə söz verib
Müdafiə naziri İsrael Katz bu bəyanatı Livanın cənubunda İsrail qüvvələrinin işğalı altında olan ərazidə lentə alınan müraciətində səsləndirib.
Çıxışında qərbdə Aralıq dənizi sahilindən şərqdə Bofor qalası və Hərmon dağının ətəklərinə qədər uzanan zonanı təsvir edən Katz deyib: “Netanyahu və mənim açıq şəkildə qeyd etdiyimiz kimi, biz bu təhlükəsizlik zonasından çəkilməyəcəyik. Buraları tərk etməyəcəyik və geriyə addım atmayacağıq. Təhlükəsizliyi təmin edərək şimal sakinlərinin sakitliyini qoruyacağıq”.
Katz İsrailin “heç bir halda” Livan, Suriya və ya Qəzzadakı təhlükəsizlik zonalarından geri çəkilməyəcəyini vurğulayıb.
“Axios” nəşrinin məlumatına görə, Tramp administrasiyası İsrail müdafiə nazirinin Livanın cənubunun işğalı ilə bağlı açıqlamalarını tənqid edib. Vaşinqton bu bəyanatların İsrail hökumətinin ABŞ və Livanla əldə olunmuş çərçivə sazişi üzrə öhdəliklərinə zidd olduğunu diqqətə çatdırıb.
