Türkiyə Cümhuriyyəti Xarici İşlər Nazirliyinin məlumatına görə, Türkiyə və İspaniya xarici işlər nazirləri Hakan Fidan və Xose Manuel Albares Bueno telefon danışığında "beynəlxalq ictimaiyyətin İsrailin Qəzzaya yardım donanmasına qarşı bu qanunsuz müdaxiləsi qarşısında ortaq mövqe tutmasının" vacibliyini vurğulayıblar.

Xarici İşlər Nazirliyinin mətbuat katibi Öncü Keçeli Hakan Fidan və Xose Manuel Albares arasında baş tutan görüşdən sonra verdiyi açıqlamada deyib: "Telefon danışığında beynəlxalq sularda üzən Qlobal Sumud donanmasına Girit (Krit) sahillərində İsrail qüvvələri tərəfindən edilən qanunsuz müdaxilənin müxtəlif millətlərdən olan çox sayda mülki şəxsin həyatını riskə atdığı və beynəlxalq hüququ pozduğu vurğulandı”.

Ö.Keçeli həmçinin hər iki nazirin "beynəlxalq birliyin hüquqa zidd bu müdaxilə qarşısında vahid mövqe nümayiş etdirməli olduğunu" qeyd etdiklərini əlavə edib.

İsrail donanması aprelin 29-da gecə saatlarında Qəzzaya doğru irəliləyən və bölgədə uzun müddətdir davam edən blokadanı yarmağı hədəfləyən donanmaya məxsus gəmiləri saxlayıb. Qrup İsrail qüvvələrinin karvanı Girit adası yaxınlığındakı beynəlxalq sularda mühasirəyə aldığını, rabitəni kəsdiyini və bir neçə gəmini müsadirə etdiyini bildirib.

Qəzzaya humanitar yardım daşıyan donanma İsrailin blokadasını yarmağı və dəniz yolu ilə humanitar dəhliz açmağı hədəfləyir. Bu addım İsrail mediasının İsrailin müxtəlif ölkələrdən təxminən 100 fəalı daşıyan və ümumilikdə 100-ə yaxın qayıqdan ibarət olan donanmanı dayandırmağa hazırlaşdığını xəbər verməsindən bir neçə saat sonra baş verib.

İsrailin Qəzza blokadası

İsrail 2007-ci ildən bəri Qəzzanı blokadada saxlayır, törətdiyi soyqırım zamanı evləri dağılan təxminən 2,4 milyon fələstinlidən 1,5 milyonunu evsiz qoyub.

İsrail 2023-cü ilin oktyabrından bəri Qəzzada həyata keçirdiyi soyqırımda əksəriyyəti qadın və uşaq olmaqla 72 500-dən çox fələstinlini öldürüb və 172 mindən çox insanı yaralayıb. Bölgənin böyük bir hissəsini xarabalığa çevirib və bütün əhalini didərgin salıb.