Litva parlamenti aprelin 17-də vacib səbəb olmadan üç ayda bir dəfədən çox Rusiyaya və ya Belarusa gedən Rusiya vətəndaşlarının yaşayış icazələrini ləğv edəcək yeni qanun qəbul edib. Bu barədə LRT ictimai yayım kanalı məlumat yayıb.
Lakin parlament eyni tədbiri Belarus vətəndaşlarına tətbiq etməkdən imtina edərək ilkin təklifi yumşaldıb.
Məlumatda xatırladılır ki, Litva kəşfiyyat xidmətləri yeni gələnlərin hamısını yoxlaya bilmədiklərini bildirdikləri üçün Belarus vətəndaşları üçün giriş məhdudiyyətlərini sərtləşdirməyə çağırıblar.
Litva 2023-cü ildə qəbul etdiyi qanunla Xarici İşlər Nazirliyinin vasitəçiliyi olmadan edilən müraciətlər istisna olmaqla, Rusiya və Belarus vətəndaşlarının Şengen və milli viza müraciətlərinin qəbulunu dayandırıb.
Litva bu tədbirlərlə Ukraynaya dəstək vermək, təcavüzkar ölkələr Rusiya və Belarus vətəndaşlarının bəzi hüquqlarını məhdudlaşdırmaq məqsədi daşıyır.
