Ukraynanın yerli rəsmiləri Rusiyanın ölkəyə qarşı həyata keçirdiyi hücumlarda Kiyevdə bir uşaq da daxil olmaqla, azı üç nəfərin öldüyünü və digərlərinin yaralandığını bildiriblər.
Kiyev meri Vitali Kliçko bu gün (16 aprel 2026) səhər saatlarında “Telegram” vasitəsilə verdiyi açıqlamada son hücumlarda həyatını itirənlər arasında Obolonski bölgəsində təcili çağırışa cavab verərkən dağıntılar altında yaralanan dörd tibb işçisinin də olduğunu qeyd edib.
Kliçko altı nəfərin xəstəxanaya yerləşdirildiyini, digərlərinin isə ayaqda müalicə aldığını deyib.
Hücumlar yaşayış sahələrində genişmiqyaslı ziyana səbəb olub. Podilski bölgəsində 16 mərtəbəli binanın altıncı mərtəbəsinə raket parçaları düşüb.
Kliçko şəhər daxilində yaşayış olmayan binalarda və nəqliyyat vasitələrində yanğınlar baş verdiyi üçün fövqəladə hallar xidmətlərinin fəaliyyət göstərdiyini bildirib.
Rusiyanın Dniprodakı hücumlarında azı bir nəfər ölüb.
Bölgə idarəsinin rəhbəri Oleksandr Qanja “Telegram”da "Dniproya təşkil edilən Rusiya hücumunda bir nəfər öldü" deyə yazıb.
Qarşılıqlı ittihamlar
Digər tərəfdən, Rusiya Ukraynanı ölkənin cənubundakı Krasnodar Krai bölgəsinə təşkil edilən hücumda iki uşağın ölümünə səbəb olmaqda ittiham edib.
Qubernator Veniamin Kondratyev “Telegram”da "Tuapsədəki yaşayış binalarına təşkil edilən terrorçu pilotsuz uçuş aparatı hücumunda beş və 14 yaşlarında iki uşaq həyatını itirdi" deyə yazıb.
Həftəsonu ərzində hər iki tərəf bir-birini 32 saatlıq Pasxa atəşkəsini pozmaqda ittiham edib.
