Kolumbiyanın “Bir Kəmər, bir yol" təşəbbüsünə qoşulması ilə Çin 9,2 milyard dollar kredit ayırmaqla Latın Amerikasında regional balansları yenidən formalaşdırır.
Çin və Kolumbiya liderlərinin Pekində görüşündən sonra “Kəmər və yol” təşəbbüsü çərçivəsində birgə əməkdaşlıq planı imzalayıblar. Bu barədə mayın 14-də dövlət mediası məlumat yayıb.
Son illərdə artan ticarət əlaqələri Pekinin Latın Amerikası və Karib hövzəsində təsirini artırıb. Bu region ABŞ üçün strateji əhəmiyyət kəsb edir.
Çin Kolumbiyanın ABŞ-dan sonra ikinci ən böyük ticarət tərəfdaşıdır. Bu yaxınlarda Kolumbiyanın ən böyük idxal mənbəyi kimi ABŞ-ı əvəz edib.
Çin prezidenti Si Cinpin Kolumbiya prezidenti Qustavo Petroya ölkəsinin Kolumbiyadan daha yüksək keyfiyyətli məhsul idxal etməyə, Çin firmalarına Kolumbiyaya investisiya qoymağa və biznes qurmaq üçün dəstək verməyə və infrastruktur layihələrində əməkdaşlıq etməyə hazır olduğunu bildirib.
9,2 milyard dollar kredit
Kolumbiyanın Xarici İşlər Nazirliyi mayın 14-də Çinlə imzalanan "tarixi" razılaşmanı alqışlayıb.
"Kolumbiya və Çin bu gün "Kəmər və yol" təşəbbüsü üçün əməkdaşlıq planı imzaladılar", -deyə bildirən XİN bu addımı "hər iki ölkə üçün investisiya, texnoloji əməkdaşlıq və davamlı inkişaf üçün yeni imkanlar açan tarixi addım" olaraq xarakterizə edib.
İmzalanan saziş Latın Amerikası liderlərinin Pekində keçirilən görüşü çərçivəsində qəbul edilib. Görüş zamanı Çin prezidenti Si Cinpin “inkişaf” məqsədi ilə 9,2 milyard dollar kredit vəd edib.
Kolumbiya prezidenti Qustavo Petro "X" platformasında etdiyi paylaşımda "Xarici əlaqələrimiz üçün tarixi addımdır. Bundan sonra Kolumbiya dünya ilə bərabərlik və azadlığa əsaslanan əlaqələr quracaq" deyib.
Petro mayın 12-də Kolumbiyanın 2013-cü ildə Çin prezidenti Si Cinpin tərəfindən irəli sürülən və qədim İpək Yolunu canlandırmaq və Çinin qlobal ticarət və infrastruktur əlaqələrini gücləndirmək məqsədi daşıyan “Bir kəmər, bir yol” təşəbbüsünə qoşulacağını açıqlayıb.
Dünyanın 150-dən çox ölkəsini əhatə edən bu proqramda Latın Amerikasının 20-dən çox ölkəsi iştirak edir. Lakin Panama fevral ayında proqramdan çıxmaq qərarına gəlib. Çin bu qərarını ABŞ-ın təzyiqi ilə əlaqələndirib.
2022-ci ilin avqustunda vəzifəsinin icrasına başlayan Petro 2023-cü ilin oktyabrında prezident kimi ilk səfərini Çinə edib və 1980-ci ildə qurulan ikitərəfli əlaqələr strateji tərəfdaşlıq səviyyəsinə yüksəlib.
