ABŞ-nin “The New York Times” qəzetində dərc olunan məqaləyə əsasən, ABŞ ordusunun Venesuelanı hədəf alan və prezident Nikolas Maduronun ələ keçirilməsini məqsəd qoyan hərbi hücumu nəticəsində təxminən 40 nəfər həlak olub.
Adının açıqlanmaması şərti ilə danışan yüksək vəzifəli Venesuela rəsmisinə istinad edilən hesabatda bildirilir ki, “Hücum zamanı mülki şəxslər və hərbçilər də daxil olmaqla təxminən 40 nəfər öldürülüb”.
ABŞ rəsmiləri qəzetə bildiriblər ki, hücum quru qoşunları yerləşdirilməzdən əvvəl Venesuelanın hava hücumundan müdafiə sistemini sıradan çıxarmağı hədəfləyən genişmiqyaslı hava əməliyyatını əhatə edib.
Məqalədə ABŞ rəsmilərinə istinadla qeyd olunur: “Hava hücumundan müdafiəni sıradan çıxarmaq məqsədilə 150-dən çox ABŞ təyyarəsi göndərilib. Bununla da hərbi helikopterlər N.Maduronun mövqeyinə hücum edən birlikləri daşıya bilib”.
Ağ Ev və ya Pentaqon tərəfindən hələlik itkilər və ya əməliyyatın tam miqyası ilə bağlı rəsmi açıqlama vrilməyib.
Xəbər verildiyi kimi, ABŞ qüvvələri yanvarın 3-də səhər saatlarında Nikolas Maduronu və onun həyat yoldaşı Siliya Floresi həbs edərək Venesueladan çıxarıb.
Donald Tramp ABŞ-nin Venesuelanı təhlükəsiz və uyğun bir keçid təmin olunana qədər idarə edəcəyini bildirib.
Nyu-Yorkun Cənub Dairəsi üzrə federal prokurorlar yanvarın 3-də səhər saatlarında ittiham aktını açıqlayaraq Nikolas Maduronu və Siliya Floresi ABŞ-yə “tonlarla kokain” gətirməkdə və digər iddia edilən cinayətlərdə təqsirləndiriblər.
Amerikanın həyata keçirdiyi bu əməliyyata tənqidi yanaşan bəzi ekspertlər isə bildiriblər ki, hücum beynəlxalq hüququ pozur, ABŞ Konqresini prosesdən kənarda qoyur və həm Venesuelada, həm də daha geniş regionda sabitsizliyin dərinləşməsi riskini artırır.
