ABŞ prezidenti Donald Tramp çərşənbə axşamı Körfəz turuna başlayacaq və səfərinə Səudiyyə Ərəbistanından başlayacaq. Səfər çərçivəsində o, Qətər və Birləşmiş Ərəb Əmirliklərinə də baş çəkəcək.
Ağ Evin yaydığı bəyanatda qeyd olunub ki, prezident Trampın bölgəyə səfəri səbirsizliklə gözlənilir. Xatırladaq ki, Donald Tramp prezidentliyinin ilk dövründə də ilk xarici səfərini məhz Səudiyyə Ərəbistanına etmişdi.
Səfərdən öncə Ağ Ev diplomatik sahədə bir sıra mühüm təşəbbüslərlə çıxış edib. Bu təşəbbüslərə Hindistan və Pakistan arasında atəşkəsin əldə olunması, Qəzzada amerikalı girovun azad edilməsi və İranla nüvə danışıqlarının yeni raundunun başlanması üçün aparılan səylər daxildir. Bütün bunlar Trampın ötən həftə Yəməndə İranın dəstəklədiyi husilərlə atəşkəs razılaşmasının əldə olunmasını elan etməsindən sonra həyata keçirilib.
Müqavilələr
Səfərin gündəmində ticarət anlaşmalarının olması gözlənilir. "Atlantic Council" təşkilatının Yaxın Şərq Təhlükəsizliyi Təşəbbüsünün əməkdaşı Daniel B. Şapiro bildirib ki, Ağ Evdəki mənbələr prezidentin razılaşmalara diqqət yetirəcəyini açıqlayıb.
Donald Trampın sözçüsü Karoline Lavit səfərdən əvvəl prezidentin “ekstremizmin ticarət və qarşılıqlı əlaqə ilə əvəz olunduğu” baxışını təbliğ etmək üçün Yaxın Şərqə səfərini səbirsizliklə gözlədiyini söyləyib.
Körfəz ölkələri Trampın ikinci müddətində özlərini əsas diplomatik tərəfdaşlar kimi təqdim edirlər. Doha "Həmas" və İsrail arasında danışıqlarda əsas vasitəçi rolunu oynamağa davam edir, Səudiyyə Ərəbistanı isə Ukraynadakı müharibə ilə bağlı danışıqlara ev sahibliyi edir.
Səudiyyə Ərəbistanının faktiki lideri, vəliəhd şahzadə Məhəmməd bin Salmanın ABŞ iqtisadiyyatına 600 milyard dollar investisiya qoyacağı bildirilir. Donald Tramp isə bunun təxminən bir trilyon dollara çatdırılmasını xahiş edəcəyini bildirib. "Düşünürəm ki, onlar bunu edəcəklər, çünki biz onlarla çox yaxşı rəftar etmişik", - deyə Donald Tramp qeyd edib.
Müdafiə Nazirliyinə yaxın olan Səudiyyə Ərəbistanı rəsmisi isə bildirib ki, Ər-Riyad milyardlarla dollar dəyərində ən müasir hava hücumundan müdafiə sistemləri və ABŞ istehsalı olan "F-35" döyüş təyyarələri almağa çalışacaq. AFP-nin məlumatına görə, o, həmçinin, "Biz tədarüklərin Trampın dövründə baş tutmasını şərt qoyacağıq" deyib.
