Kuala-Lumpur "Global Sumud" yardım donanmasının beynəlxalq sularda dayandırılması zamanı fəalların qaçırılması və onlara işgəncə verilməsi iddiaları ilə əlaqədar İsrailə qarşı Beynəlxalq Ədalət Məhkəməsində (BƏM) hüquqi proses başlatmağa hazırlaşır.
Yerli mətbuatın yaydığı məlumata görə, Malayziya hökuməti Qəzzaya gedən "Global Sumud" humanitar yardım donanmasındakı fəalların qaçırıldığı və işgəncələrə məruz qaldığı iddiası ilə İsrailə qarşı Beynəlxalq Ədalət Məhkəməsində iddia qaldırmağa hazırlaşır.
"Malay Mail" qəzetinin xəbərinə görə, Malayziyanın Selanqor ştatının Baş naziri Əmirudin Şari vəkillərin məlumat və dəstəkləyən sübutların toplanması prosesini başa vurduqdan sonra Kuala-Lumpurun məhkəmə prosesinə başlayacağını bildirib.
Qəzzaya yardım çatdırmaq üçün İsrailin dəniz blokadasını yarmağı hədəfləyən donanmadakı 400-dən çox beynəlxalq fəal keçən həftə beynəlxalq sularda İsrail qüvvələrinin hücumuna məruz qalaraq saxlanılıb.
Əmirudin Kuala-Lumpur Beynəlxalq Hava Limanında "Global Sumud Flotilla 2.0" qrupunun qarşılanma mərasimindəki çıxışında deyib: “Səssiz qalmayacağıq, dayanmayacağıq. Hüquq qrupu beynəlxalq hüquq pozuntularına dair bütün sənədləri toplayarkən, onlar bir neçə dəfə qaçırılıb və işgəncələrə məruz qalıblar”.
O, “Bunun beynəlxalq məhkəməyə müraciət edəcəyik, diplomatik təzyiqləri davam etdirəcəyik və Malayziyanın dörd bir tərəfində fəaliyyətlər həyata keçirəcəyik”,-deyə əlavə edib.
Əmirudin qeyd edib ki, bu hüquqi addım xüsusilə malayziyalı iştirakçıların da daxil olduğu donanma fəallarına qarşı qaçırma və işgəncə kimi qəddarlıq iddialarından sonra atılıb.
O, bu prosesin ardınca Qəzzanın “tam azadlığı” tələbi ilə hökumət tərəfindən diplomatik təzyiqlərin davam etdiriləcəyini vurğulayıb.
Əmirudin "GSF 2.0" missiyası başa çatsa da Malayziya və Selanqorun Fələstin məsələsinə sadiqliyinin davam edəcəyini bildirib.
O, təbliğat işlərini gücləndirmək məqsədilə gələcəkdə Fələstinlə bağlı beynəlxalq konfransların Malayziyada keçirilməsinin planlaşdırıldığını diqqətə çatdırıb.
Əmirudin həmçinin əlavə edib ki, "Sumud 3.0" Qəzza blokadası qaldırılana qədər mübarizəni davam etdirəcək.
