Niderlandda əlverişsiz hava şəraiti və dəmir yolu sistemində baş verən texniki nasazlıqlar səbəbindən yanvarın 6-da ölkə üzrə daxili qatar reysləri müvəqqəti dayandırılıb.

Amsterdam ətrafında nəqliyyatın fəaliyyətində problemlər davam edir. “Schiphol” beynəlxalq hava limanında 400-dən çox reysin ləğv edildiyi bildirilir.

Fransada buzlanma yol hərəkəti üçün təhlükə yaradıb. Yerli medianın məlumatına görə, son günlərdə dondurucu hava şəraiti ilə əlaqədar baş verən yol-nəqliyyat hadisələri nəticəsində beş nəfər həyatını itirib. Ölkənin qərb və şimal bölgələrində altı kiçik hava limanı fəaliyyətini dayandırıb. Rəsmi qurumlar vətəndaşlara zərurət olmadıqca səfərə çıxmamaq və uzaqdan işləməyi tövsiyə edib.

Almaniyada temperatur bəzi bölgələrdə mənfi 10 dərəcədən aşağı düşüb, ölkənin böyük hissəsi qarla örtülüb. Meteoroloji xidmətlərin proqnozuna görə, yaxın günlərdə xüsusilə şimal və şərq ərazilərində güclü qar yağacağı gözlənilir.

Böyük Britaniyada Meteorologiya Xidməti qış şəraitindən irəli gələn risklərin həftə ərzində davam edəcəyini açıqlayıb. Şotlandiyanın mərkəzi bölgələri üçün qarla bağlı hava xəbərdarlığı elan edilib.

Balkanların qərb hissəsində də güclü qar və yağış yolların bağlanmasına, elektrik enerjisinin verilişində fasilələrə və daşqınlara səbəb olub. Bosniya və Herseqovinanın paytaxtı Sarayevoda qarın ağırlığı nəticəsində ağacın aşması bir nəfərin ölümü ilə nəticələnib.