Prezident Ərdoğan Fransa Prezidenti Makronla telefon söhbətində bildirib ki, Türkiyə Ukrayna ilə Rusiya arasında atəşkəsin və davamlı sülhün təmin olunması üçün aparılan danışıqlara vasitəçilik də daxil olmaqla, hər cür kömək göstərməyə hazırdır.
Telefon danışığı zamanı Ərdoğan qeyd edib ki, Rusiya ilə Ukrayna arasındakı müharibənin sona çatdırılması səylərində “tarixi bir dönüş nöqtəsinə” gəlinmişdir və bu fürsətdən istifadə edərək sülhün təmin olunmasının vacibliyini vurğulayıb. Türkiyənin İctimaiyyətlə Əlaqələr Departamentinin mayın 11-də yaydığı məlumatda qeyd edilir ki, Ərdoğan “Türkiyə, atəşkəsin və davamlı sülhün təmin olunmasına kömək etmək məqsədilə danışıqlara ev sahibliyi də daxil olmaqla, hər cür töhfə verməyə hazırdır.”
Ərdoğan, həmçinin uzunmüddətli sülh danışıqlarının başlanması və Ukraynanın müharibədən sonrakı yenidənqurma prosesinə dəstək verilməsi sahəsində Fransa ilə əməkdaşlığın davam etdirilməsinin əhəmiyyətini vurğulayıb.
Hər iki ölkə rəhbəri ikitərəfli münasibətlərlə yanaşı, qlobal və regional məsələləri də müzakirə ediblər.
Putinlə telefon danışığı
Türkiyə Prezident Administrasiyasının yaydığı məlumatda bildirilir ki, Prezident Ərdoğan Rusiya Prezidenti Vladimir Putinlə də telefonla danışıb. Ərdoğan Putinə bildirib ki, Rusiya–Ukrayna sülh danışıqlarının İstanbulda qaldığı yerdən davam etdirilməsini dəstəkləyən açıqlamanı eşitməkdən məmnunluq duyub. Ərdoğan həmçinin Türkiyənin Ukrayna münaqişəsinin davamlı həllinə yönəlmiş danışıqlara ev sahibliyi etməyə hazır olduğunu bir daha Putinə çatdırıb.
Bu telefon danışığı Rusiya Prezidenti Vladimir Putinin Moskvada gecə yarısı keçirdiyi mətbuat konfransından sonra baş tutub. O, mayın 8-də bəyan edib ki, Moskva ilə Kiyev arasında birbaşa sülh danışıqları İstanbulda yenidən başlaya bilər.
Qeyd edək ki, uzun müddətdir münaqişənin həlli üçün səylər göstərən Ərdoğan Türkiyənin sülh danışıqlarına ev sahibliyi etməyə hazır olduğunu dəfələrlə vurğulayıb. Türkiyənin həm Rusiya, həm də Ukrayna ilə yaxşı münasibətdə olması bu sahədə mühüm üstünlükdür.
Bu təklifə cavab olaraq, Ukrayna Prezidenti Volodimir Zelenski “X” platformasında etdiyi paylaşımda bildirib ki, əgər Moskva Ukraynada “tam, davamlı və etibarlı” bir atəşkəsi mayın 12-dən etibarən təsdiq edərsə, ölkəsi Rusiya ilə birbaşa danışıqlara başlamağa hazırdır.
