Türkiyə Prezidenti yanında Müdafiə Sənayesi İdarəsinin rəisi Haluk Görgünün sözlərinə görə, Türkiyənin müdafiə və aerokosmik sənaye üzrə ixracatı yanvar–noyabr ayları ərzində rekord göstəriciyə imza ataraq 7,4 milyard dollara çatıb.

H.Görgün dekabrın 4-də rəsmi “NSosyal” platformasında bildirib ki, müdafiə və aerokosmik ixracatı təkcə 2025-ci ilin noyabr ayında 747 milyon dollara yüksəlib ki, bu da ötən ilin eyni dövrü ilə müqayisədə 22 faiz artım deməkdir.

Haluk Görgün deyib: “Bu irəliləyişlə sektorumuz yalnız noyabr ayında əldə edilən artımla deyil, həm də ilin ümumi nəticələri ilə yeni bir rekorda imza atdı. Cəmi 11 ayda əldə etdiyimiz ixrac göstəriciləri bütün zamanların ən yüksək illik səviyyəsini geridə qoydu”.

O, qeyd edib ki, sektor yüksək əlavə dəyərli məhsullar üzrə sabit artımı qorumaqla yanaşı, ixrac həcmlərini genişləndirib və qlobal bazarlarda rəqabət qabiliyyətini daha da artırıb.

Görgün Müdafiə Sənayesi İdarəsinin əsas məqsədlərinin ixracatçı şirkətlərin sayını artırmaq, KOBİ-ləri qlobal təchizat zəncirlərinə inteqrasiya etmək və davamlı, yüksək əlavə dəyərli ixrac modelini inkişaf etdirmək olduğunu bildirib.

Müdafiə Sənayesi İdarəsinin rəisi həmçinin deyib:“Türkiyə müdafiə sənayesində istehsal edən, inkişaf etdirən və ixracatı gücləndirən güclü bir ekosistemə sahib olaraq yoluna qətiyyətlə davam edir”.

Eyni gün açıqlanan ümumi ixrac məlumatlarına əsasən, Türkiyənin ümumi ixracı noyabr ayında ötən ilin eyni dövrü ilə müqayisədə 2,2 faiz artaraq 22,7 milyard dollara çatıb.