Qəzza hökumətinin mətbuat ofisi oktyabrın 21-də (bu gün) yaydığı açıqlamada bildirib ki, atəşkəsin qüvvəyə minməsindən bəri humanitar yardım daşıyan cəmi 986 maşın bölgəyə daxil ola bilib. Bu göstərici, atəşkəs razılaşması çərçivəsində müəyyənləşdirilən saydan çox aşağıdır.
Açıqlamada qeyd olunub ki, atəşkəs razılaşmasına əsasən, Qəzzaya oktyabrın 20-ə qədər ümumilikdə 6 min 600 yardım maşınının girişinə icazə verilməli idi.
Rəqəmlərə əsasən, atəşkəs qüvvəyə mindikdən sonra Qəzzaya daxil olan yardım maşınlarının gündəlik orta sayı 600 olmalı idi, lakin bu göstərici 89 maşını keçmir.
Mətbuat Ofisinin açıqlamasında deyilir: “Bu vəziyyət, İsrailin Qəzzada yaşayan 2,4 milyondan çox fələstinliyə qarşı davam etdirdiyi sıxıntıya salma, aclığa məhkum etmə və humanitar yardımlardan məhrum buraxma siyasətinin hələ də davam etdiyini açıq şəkildə göstərir.”
Qəzzaya həyati əhəmiyyət daşıyan xidmətləri, çörək sexlərini, xəstəxanaları, generatorları və digər zəruri infrastrukturu təmin etmək məqsədilə 14 maşın dolusu məişət qazı balonları və 28 maşın dolusu günəş yanacağı (kimyəvi yanacaq növü) gətirilib.
Lakin bölgənin rəsmiləri bildiriblər ki, bu materialların miqdarı məhduddur və Qəzzanın əsas ehtiyaclarını qarşılamır. Açıqlamada deyilir: “Gündəlik və davamlı şəkildə, ərzaq, tibbi ləvazimatlar, yardım məhsulları, texniki yanacaq və məişət qazı daşıyan təxminən 600 humanitar yardım maşınının bölgəyə daxil olması həyati zərurətdir.”
Xatırladaq ki, Qəzzada 10 oktyabr tarixində atəşkəs razılaşması qüvvəyə minib. Bu razılaşma, ABŞ prezidenti Donald Tramp tərəfindən təqdim edilən mərhələli plan əsasında hazırlanıb.
Planın ilk mərhələsi, israilli girovların fələstinli məhbuslarla dəyişdirilməsini nəzərdə tutur. Razılaşmanın davamında isə Qəzzada tikinti-bərpa işlərinin aparılması və “Həmas”ın daxil olmadığı yeni bir idarəetmə mexanizminin yaradılması planlaşdırılır.
Fələstin Səhiyyə Nazirliyinin məlumatına görə, 2023-cü ilin oktyabrından bəri İsrailin soyqırım xarakterli müharibəsi nəticəsində 68 min 200-dən çox insan həlak olub, 170 min 200-dən çox şəxs yaralanıb.
