Xarici işlər naziri Hakan Fidan Ukraynada sülhün təmin olunması səyləri çərçivəsində NATO ölkələrinin xarici işlər nazirləri Antalyada yığıncaq üçün bir araya gələrkən Türkiyənin Ukraynadakı sülh səylərindəki strateji rolunu vurğulayıb.

Nazir Hakan Fidan Ukrayna və Rusiya arasında İstanbulda mayın 16-da keçiriləcək sülh danışıqlarının müharibə edən iki tərəf arasında yeni başlanğıc üçün zəmin yarada biləcəyinə ümid etdiyini bildirib.

Hakan Fidan NATO-nun Antalyada keçirilən qeyri-rəsmi görüşünün açılışında etdiyi çıxışda “3 illik əziyyətdən sonra bir fürsət pəncərəsinin açıldığını görürük” deyib.

Nazir Fidan NATO daxilində ABŞ-ın Texas ştatından Türkiyənin paytaxtı Ankaraya qədər uzanan təhlükəsizlik şəbəkəsinin yaradılmasının vacibliyini vurğulayıb.

NATO-nun qeyri-rəsmi toplantısının ikinci günündə jurnalistlərə açıqlama verən Hakan Fidan Avro-Atlantik bölgəsində baş verən bir çox mühüm hadisəyə diqqət çəkib.

“Müttəfiq tərəfdaşlar olaraq bu gün müdafiə yükünün bölüşdürülməsini necə idarə etməkdən tutmuş, müdafiə sənayesi infrastrukturumuzu necə gücləndirəcəyimizə, Ukraynaya sülhü necə gətirə biləcəyimizə qədər mühüm müzakirələrimiz olacaq”, -deyə o qeyd edib.

Nazir bildirib ki, NATO tərəfdaşları kimi onlar Ukraynada müdafiə sahəsində əməkdaşlıq və sülhməramlılığı müzakirə edəcəklər.

Fidan əlavə edib ki, görüş həm də iyunda Haaqada keçiriləcək NATO sammitinə zəmin hazırlayacaq.

Qeyd edək ki, Rusiya və Ukraynanın təxminən iki ildən sonra ilk dəfə İstanbulda birbaşa sülh danışıqları aparacağı gözlənilir. Türkiyə yenidən ev sahibi və vasitəçi rolunu öz üzərinə götürür.

Antalya və İstanbulda eyni vaxtda aparılan diplomatiya ilə Türkiyə təkcə NATO-nun əsas müttəfiqi kimi deyil, həm də beynəlxalq münaqişələrin həllində artan nüfuzu olan diplomatik mərkəz kimi özünü təsdiq edir.