Livanın "Hizbullah" hərəkatı İsrailin şimalındakı hərbi obyektlərə və infrastruktura raket hücumları təşkil etdiyini açıqlayıb. Məlumata görə, işğal altındakı Hayfa şəhərinin şərqində yerləşən Kiryat Ata bölgəsindəki infrastruktur obyektləri raket atəşinə tutulub. İsrailin şimalındakı Metula və Malkiya yaşayış məntəqələrində olan hərbi texnika və şəxsi heyət də hədəf alınıb.
Hərəkat həmçinin Livanın cənubundakı Qantara şəhəri yaxınlığındakı Cnijal yüksəkliyində və Sədr ərazisində İsrail qüvvələrinin toplanma məntəqələrinə zərbələr endirdiyini bəyan edib. Gün ərzində həyata keçirilən əməliyyatların ümumi sayı 12-yə çatıb. Bundan əlavə, İsrailin şimalındakı Even Menachem yaşayış məntəqəsinin PUA-larla hədəf alındığı bildirilib.
Qeyd edək ki, İsrail ordusu martın 2-dən etibarən Livana qarşı intensiv hava zərbələri endirməklə yanaşı, ölkənin cənubunda quru əməliyyatlarını da davam etdirir. Livan rəsmilərinin son məlumatına görə, İsrailin hücumları nəticəsində indiyədək 1318 nəfər həyatını itirib, 3935 nəfər isə müxtəlif dərəcəli xəsarətlər alıb.
