Kremlin sözçüsü Dmitri Peskov dekabrın 1-də (bu gün) keçirdiyi brifinqdə jurnalistlərə açıqlamasında Rusiya prezidenti Vladimir Putinin sabah Moskvada ABŞ-nin xüsusi nümayəndəsi Stiv Vitkof ilə Ukrayna məsələsini müzakirə etmək məqsədilə görüş keçirəcəyini bildirib.

V.Putin ötən həftə bəyan etmişdi ki, Rusiyanın Ukraynaya hücumlarını dayandırmaq üçün Moskva hökumətinin tələb etdiyi bölgələr təhvil verilməlidir. Əks halda, Rusiya ordusu həmin əraziləri güc tətbiq etməklə ələ keçirəcək.

Bildirilir ki, S.Vitkoff daha əvvəl də Kremlində Rusiya dövlət başçısı V.Putinlə bir neçə dəfə görüş keçirib. Hətta ABŞ rəsmisi Moskva rəhbərliyi ilə apardığı danışıqlardakı yanaşmasına görə tənqid də olunmuşdu. ABŞ-nin müharibənin başa çatdırılmasına dair ilkin sülh planı isə geniş şəkildə Kremlin tələblərinə həddindən artıq güzəşt kimi qiymətləndirilmişdi.

Bundan əlavə bildirilir ki, Avropa İttifaqı gələn həftənin Ukrayna üçün “həlledici məqam” ola biləcəyini bildirib. Belə ki, Ukrayna prezidenti Volodimir Zelenski dekabrın 1-də (bu gün) Parisə gedərək Avropanın Kiyev üçün dəstəyini artırmağa çalışıb.

ABŞ prezidenti Donald Tramp isə demək olar dörd ildir davam edən müharibənin sona çatdırılmasına yönəlmiş mümkün bir razılaşma barədə nikbin olduğunu qeyd edib.