Qətər, Birləşmiş Ərəb Əmirlikləri, Bəhreyn və Səudiyyə Ərəbistanı Küveytin dəniz suverenliyini dəstəklədiklərini bildirib, İraqı beynəlxalq hüquqa hörmət etməyə çağırıblar.

Həmin ölkələr İraqın yeni dəniz koordinatlarını və yenilənmiş xəritəsini Birləşmiş Millətlər Təşkilatına təqdim etməsindən sonra, Küveytin dəniz əraziləri üzərindəki suverenliyini dəstəklədiklərini bir daha təsdiqləyiblər.

Qətər Xarici İşlər Nazirliyi bəyan edib ki, Qətər Dövləti qardaş Küveytlə tam həmrəydir. Nazirlik İraq tərəfindən BMT-ye təqdim edilən, Küveytin dəniz ərazilərini, habelə paylaşılan Fəth əl-Qaid və Fəth əl-Ayc kimi sabit dəniz sərhədlərini pozan koordinat siyahılarına və xəritəyə qarşı olduğunu bildirib.

Bəhreyn Xarici İşlər Nazirliyinin (Qətər xəbər agentliyi tərəfindən yayılan) açıqlamasına görə, İraqın təqdim etdiyi sənədlər Küveytin suverenliyini pozur. Nazirlik vəziyyəti "diqqətlə izlədiyini" vurğulayıb. Bəyanatda İraq, iki ölkə arasındakı tarixi münasibətləri nəzərə almağa və beynəlxalq hüquq prinsiplərinə uyğun olaraq məsuliyyətli davranmağa çağırılıb.

BƏƏ Xarici İşlər Nazirliyi də Küveytin qanuni hüquqlarına dəstəyini təkrarlayaraq İraqın təklifi ilə bağlı narahatlığını ifadə edib: "Bu məsələyə beynəlxalq hüquq prinsiplərinə, 1982-ci il BMT-nin Dəniz Hüququ haqqında Konvensiyasının (UNCLOS) müddəalarına və ikitərəfli sazişlərə uyğun yanaşmaq lazımdır".

Səudiyyə Ərəbistanı isə İraqın təqdim etdiyi siyahıda iki ölkənin təbii sərvətləri paylaşdığı "bölünmüş bölgəyə" bitişik ərazilərin də olduğunu qeyd edib. Rəsmi Ər-Riyad bu koordinatların Küveytin suverenliyini pozduğunu bildirib.

Xatırladaq ki, Küveyt fevralın 21-də Bağdadın bu addımına etiraz olaraq İraqın müvəqqəti işlər vəkilini Xarici İşlər Nazirliyinə çağırıb. Nazirlik iddia ərizəsinə Küveytin tam suverenliyi altında olan Fəth əl-Qaid və Fəth əl-Ayc ərazilərinin daxil edilməsini qəbulolunmaz adlandırıb.