Qüvvədə olan atəşkəs razılaşmasına baxmayaraq İsrail qüvvәlәrinin Qəzzaya endirdiyi yeni zərbələr nəticəsində ən azı 9 fələstinli həlak olub, uşaqlar da daxil olmaqla çox sayıda insan yaralanıb. İsrail qüvvәlәri Qәzzadakı dörd yaşayış məntəqəsini hədəf alıb.
Ən çox itkinin qeydə alındığı hücumda Labid ailəsinin beş üzvü, o cümlədən üç uşaq həyatını itirib. Doqquz yaşlı bir qız uşağı isə bu dağıdıcı zərbədən yüngül xəsarətlərlə sağ çıxa bilib. Tibbi mənbələr bildirir ki, müxtəlif nöqtələrə təşkil edilən digər hücumlarda daha dörd fələstinli ölüb, daha bir qadın isə əvvəlki bombardmanlar zamanı aldığı ağır xəsarətlərdən xəstəxanada dünyasını dəyişib
Hava hücumları ilə yanaşı, İsrail ordusu Qəzzanın həm şimalında, həm də cənubunda binaları və yaşayış sahələrini kütləvi şəkildə dağıtmağa davam edir. Şahidlərin verdiyi məlumata görə, işğalçı qüvvələr cənubdakı Xan Yunis şəhərinin şərqində azı 10 binanı, həmçinin Qəzzanın şərq məhəllələrində daha iki obyekti tamamilə məhv ediblər.
Qeyd edək ki, İsrailin 2023-cü ilin oktyabrında Qəzzada başlatdığı genişmiqyaslı hərbi əməliyyatlar nəticəsində indiyədək 70 000-dən çox fələstinli həyatını itirib, 120 000-dən çox insan isə yaralanıb.
2025-ci ilin oktyabrında elan edilən rəsmi atəşkəs razılaşmasına baxmayaraq İsrail tərəfi humanitar yardımın Qəzzaya girişini məhdudlaşdırmağa davam edir. Atəşkəs dövründə törədilən hücumlar nəticəsində indiyədək əksəriyyəti qadın və uşaq olmaqla daha 936 fələstinli həlak olub, 2903 nəfər isə müxtəlif dərəcəli xəsarətlər alıb.
