Almaniyanın maliyyə naziri Lars Klinqbayl Rusiyanın dondurulmuş aktivlərindən istifadəyə dair təkliflər üzərində konstruktiv işləmək niyyətində olduqlarını bildirib. O, rəsmi Berlinin bu hüquqi cəhətdən həssas məsələni müzakirə etməyə açıq olduğunu vurğulayıb.

Nazir həmkarları ilə görüşdən əvvəl verdiyi açıqlamada deyib:
"Hər şey diqqətlə araşdırılmalıdır. Almaniya maneə yaradan yox, şərait yaradan bir rol oynayacaq’’.

Rusiyanın dondurulmuş aktivlərindən birbaşa istifadə məsələsi Aİ daxilində bəzi ölkələr üçün "qırmızı xətt" sayılır. ABŞ prezidenti Donald Tramp dövründə Vaşinqtonun Kiyevə dəstəyinin qeyri-müəyyən olması səbəbindən, bu aktivlərdən Ukraynaya yardım üçün daha səmərəli istifadə yollarının tapılması aktuallaşıb.

Avropa İttifaqı Rusiyanın Ukraynaya qarşı hücumundan sonra ilk dəfə dondurulmuş aktivlərdən əldə olunan faiz gəlirlərindən istifadə imkanını müzakirə edib. Almaniya isə hüquqi narahatlıqlar səbəbindən bu aktivlərin tam müsadirəsinə dair təkliflərə ehtiyatla yanaşıb.

Lars Klinqbayl bildirib ki, koalisiya hökuməti hüquqi çətinliklərə baxmayaraq dondurulmuş aktivlərin daha səmərəli istifadəsinə nail olmaqda qərarlıdır.