Türkiyə Əməkdaşlıq və Koordinasiya Agentliyi (TİKA) İraqın Kərkük şəhərinə bağlı Altunkörpü qəsəbəsində yerləşən Altunkörpü Şəhidliyində bərpa işlərinə başlayıb.

Bu barədə İraq Türkmən Cəbhəsinin (İTK) Altunkörpü üzrə rəhbəri Zəki İbrahim Şeyx "Anadolu" agentliyinə açıqlama verib. O, qəsəbənin mərkəzində yerləşən Altunkörpü Şəhidliyi və abidəsində başladılan bərpa işlərinə görə TİKA-ya təşəkkürünü bildirib.

Abidənin Səddam Hüseyn rejiminin devrilməsindən sonra 2003-cü ildə ucaldıldığını qeyd edən Z.İ.Şeyx o vaxtdan bəri burada heç bir bərpa işinin aparılmadığını deyib.

Şəhidliyin türkmənlər üçün böyük mənəvi əhəmiyyət kəsb etdiyinə diqqət çəkən Z.İ.Şeyx deyib: "Şəhidlik hər keçən gün daha da aşınırdı. Sağ olsun TİKA bərpa işlərinə başladı. Altunkörpülülər və bütün türkmənlər üçün bu şəhidlik son dərəcə əhəmiyyət kəsb edir."

Bərpa işləri çərçivəsində şəhidliyin ətrafında abadlıq işlərinin aparıldığını bildirən Z.İ.Şeyx ərazidə oturacaqların qoyulduğunu qeyd edib. O, həmçinin şəhidlərin adlarının həkk olunduğu mərmər lövhənin abidənin mərkəzinə yerləşdirildiyini deyib. Z.İ.Şeyx bu layihəyə dəstək verən İraq Türkmən Cəbhəsinə də minnətdarlığını bildirib.

Altunkörpü qətliamı

İraqın devrilmiş rəhbəri Səddam Hüseynə bağlı hərbçilər 1991-ci il martın 28-də Kərkükdən 44 kilometr şimalda yerləşən Altunkörpü qəsəbəsində qətliam törətmişdilər. Həmin vaxt aralarında uşaq və qocaların da olduğu 100-dən çox türkmən qətlə yetirilmişdi.

Türkmənlər hər il martın 28-də Altunkörpü qəsəbəsindəki şəhidlikdə anım mərasimləri keçirir. Onlar bu tədbirlərdə qətliamda həyatını itirənlərin xatirəsini ehtiramla yad edirlər.