ÜST rəhbəri Tedros Adhanom Qebreyesus İsrail ordusunun qadınları və uşaqları piyada təxliyə etməyə məcbur etdiyini, kişi heyətin əllərinin qandallandığını, soyunduğunu və yerində sorğu-sual edildiyini açıqlayıb.
Ümumdünya Səhiyyə Təşkilatının rəhbəri Tedros Adhanom Qebreyesus iyulun 21-də bildirib ki, İsrail qüvvələri Qəzzanın Deyr-Balax şəhərində ÜST işçilərinin mənzilinə və əsas anbarına üç dəfə hücum edərək işçiləri və onların ailələrini saxlayıb.
Qebreyesus "Toqquşmalar davam edərkən İsrail ordusu binaya girərək qadın və uşaqları piyada olaraq əl-Mavasiyə təxliyyə etməyə məcbur etdi. Kişi işçilər və onların ailələri qandallanıb, soyundurulub, dindirilib və hadisə yerində silah gücünə axtarış aparılıb. ÜST-ün iki əməkdaşı və iki ailə üzvü saxlanılıb" deyib.
Üç nəfərin daha sonra sərbəst buraxıldığını, bir işçinin isə həbsdə qaldığını bildirən Tedros əlavə edibi ki, ÜST-ün 32 işçisi və onların ailələrinə giriş yaradılan kimi ÜST ofisinə təxliyə edilib.
“ÜST saxlanılan şəxsi heyətin dərhal azad edilməsini və bütün personalının müdafiəsini tələb edir”, -deyə rəhbər qeyd edib.
Gecikmiş atəşkəs
İsrailin Deyr Balaxda son təxliyə əmrindən narahatlığını ifadə edən Qebreyesus bunun ÜST-ün bir çox obyektinə təsir etdiyini, agentliyin Qəzzada fəaliyyət imkanlarını və səhiyyə sistemini daha da zəiflətdiyini vurğulayıb.
"ÜST-ün Deyr-Balaxdakı əsas anbarı təxliyə zonasında yerləşir və dünənki hücumun içərisində baş verən partlayış və yanğın nəticəsində zədələnib. ÜST təcili olaraq üzv dövlətləri Qəzzaya tibbi ləvazimatların müntəzəm və davamlı axını təmin etməyə çağırır. ÜST-ün işinin pozulması Qəzzada bütün səhiyyə reaksiyasını iflic etdi. Atəşkəs təkcə lazım deyil, bu, çoxdan gözlənilən zərurətdir", -deyə o vurğulayıb.
İsrailin Qəzzada soyqırımı
İsrail mühasirəyə alınan bölgədə törətdiyi qırğında əksəriyyəti qadın və uşaq olmaqla 59 min fələstinlini öldürüb.
Fələstinin rəsmi xəbər agentliyi olan WAFA-nın məlumatına görə, təxminən 11.000 fələstinlinin sökülən evlərin dağıntıları altında qaldığı təxmin edilir.
Bununla belə, ekspertlər deyirlər ki, əsl ölənlərin sayı Qəzza rəsmilərinin bildirdiyindən qat-qat çoxdur və 200 minə yaxın ola bilər.
Soyqırım zamanı İsrail mühasirəyə alınmış Qəzzanın böyük hissəsini xarabalığa çevirdi, demək olar ki, bütün əhalisini köçürdü.
İsrail həmçinin həyati əhəmiyyət daşıyan humanitar yardımların girməsinə mane olarkən sadəcə BMT-nin yardım səylərini dayandırmaq üçün qurulan, ABŞ-ın dəstəklədiyi və “ölüm tələsi” kimi təsvir edilən mübahisəli yardım qrupuna icazə verdi.
