Ölümcül toqquşmalardan sonra druz döyüşçüləri ilə bədəvi qəbilələri arasında əldə edilmiş kövrək atəşkəsin ortasında beş avtobusdan ibarət karvan Süveydadan yola düşüb.

Suriya hakimiyyəti hökumətin koordinasiyası və Təhlükəsizlik Qüvvələrinin müşayiəti ilə ölkənin cənubundakı Süveyda şəhərinin bir qrup druz sakinini təxliyə edib.

Süveyda Qubernatorluğu iyulun 29-da bəyanat yayaraq, "Hökumətin yardımı və təhlükəsizlik şəraitində Süveydanı tərk etmək istəyən bir qrup druz vətəndaşı təxliyə edildi" ifadəsini işlədib.

Qeyd edək ki, təxliyə işi Dəra vilayətindəki Busra əş-Şam humanitar sərhəd-keçid məntəqəsi vasitəsilə beş avtobusdan ibarət karvan tərəfindən həyata keçirilib.

Səlahiyyətlilər qrupun çatacağı son yeri açıqlamayıb, lakin Dəra əvvəllər Süveydadan köçürülən sakinləri müvəqqəti sığınacaq yerləri ilə təmin edib.

Şəhər miqyasında ölümcül toqquşmalar

Süveydada silahlı druz qrupları ilə bədəvi qəbilələri arasında bir həftədən çox davam edən gərgin döyüşlərdən sonra təxliyə iyulun 19-da əldə olunan atəşkəsdən sonra gərgin sakitlik şəraitində baş verib.

Dəməşq hökuməti zorakılığın başlanmasından bəri dörd ayrı atəşkəs razılaşması elan edib.

İyulun 19-da əldə edilən son atəşkəs əsasən qüvvədə olsa da, druzların ruhani lideri Şeyx Hikmət əl-Hicriyə sadiq qrupların bədəvi qəbilələrini ərazidən çıxarması və onlara qarşı insan haqları pozuntuları törətməsi iddialarından sonra əvvəlki razılaşmalar pozulub.

Suriya keçid hökuməti ölkə daxilində sabitliyi qorumağa və yerli münaqişələri danışıqlar yolu ilə həll etməyə söz verib.