Türkiyənin vitse-prezidenti Cevdet Yılmaz bu gün Qırğızıstana rəsmi səfər edəcək. Cevdet Yılmaz səfər çərçivəsində ilk olaraq Ürkün abidəsini və qırğız yazıçısı Çingiz Aytmatovun məzarını ziyarət edəcək. O, daha sonra Qırğızıstan prezidenti Sadır Japarovla görüşəcək, Qırğızıstan-Türkiyə Manas Universitetinin (KTMU) 30 illik yubileyi münasibətilə keçiriləcək konsertdə iştirak edəcək və Bişkekdə Türkiyənin işgüzar dairələrinin nümayəndələri ilə bir araya gələcək.
Cevdet Yılmaz sentyabrın 18-də Qırğızıstan Nazirlər Şurasının sədri Adilbek Kasıməliyevlə görüşəcək. Həmin gün Türkiyə-Qırğızıstan İqtisadi Komissiyasının (KEK) 12-ci Toplantısında iştirak edəcək.
Vitse-prezident həmçinin Türkiyə-Qırğızıstan Biznes Forumuna qatılacaq, Qırğızıstan-Türkiyə Manas Universitetinə baş çəkəcək, Türk Dövlətləri Təşkilatına üzv ölkələrin hökumət başçıları və vitse-prezidentlərinin toplantısında iştirak edəcək və Qırğızıstan Prezidenti Sadır Japarovla keçiriləcək birgə görüşə qatılacaq.
