“Air Canada Express”ə məxsus təyyarənin eniş zamanı hava limanına aid nəqliyyat vasitəsi ilə toqquşması ABŞ-nin ən işlək hava limanlarından biri olan “LaGuardia”da uçuşların dayanmasına və gecikmələrə səbəb olub.
CNN və NBC də daxil olmaqla ABŞ mediasının martın 24-də yaydığı məlumata görə, Nyu-Yorkdakı “LaGuardia” hava limanında yanğınsöndürmə avtomobili ilə toqquşan təyyarənin pilotu və ikinci pilotu həyatını itirib.
ABC telekanalı vəziyyət barədə qurum rəsmilərinə istinadən xəbər verib ki, hdisə nəticəsində 11 sərnişin və iki ilkin müdaxilə əməkdaşı daxil olmaqla ümumilikdə 13 nəfər yaralanaraq xəstəxanaya yerləşdirilib.
Uçuşlar ləğv edilib
Qəzadan sonra “LaGuardia” hava limanında uçuşlar dayandırılıb.
Nyu-York polisi təyyarənin Liman İdarəsinə məxsus nəqliyyat vasitəsinə çırpıldığını təsdiqləyib. Yanğınsöndürmə xidməti isə qrupların hava limanının uçuş zolaqlarından birində baş verən hadisəyə müdaxilə etdiyini bildirib. Federal Aviasiya Administrasiyası isə fasilələrin davam edə biləcəyi barədə xəbərdarlıq edərək uçuşların dayandırılması qərarını verib.
Uçuş izləmə xidməti “Flightradar24” bildirib ki, Monrealdan gələn təyyarə eniş etdikdən sonra uçuş zolağında hərəkət edərkən xilasetmə və yanğınsöndürmə avtomobilinə çırpılıb.
Hava limanı rəsmiləri hələlik bütün xəsarət hallarını tam şəkildə təsdiqləməsələr də, internetdə yayılan görüntülərdə təyyarənin ön hissəsində ciddi zədələrin olduğu və fövqəladə hallar xidmətlərinin ərazini nəzarətə aldığı görünür.
Hava limanında yaşanan səyahət xaosu
Toqquşma nəticəsində uçuşların gecikməsi və ya ləğv edilməsi baş verib. Bu isə qurum rəsmilərinin Nyu-York şəhərində hava limanı ətrafında nəqliyyat sıxlığı ilə bağlı xəbərdarlıq etməsinə səbəb olub.
Qeyd edilir ki, baş verən hadisə son günlər əlverişsiz hava şəraiti və kadr çatışmazlığı səbəbindən artıq fəaliyyətində ləngimələr yaşanan “LaGuardia” hava limanındakı mövcud problemləri daha da ağırlaşdırıb.
Fövqəladə hallar xidmətləri hadisə yerində işlərini davam etdirərkən və araşdırmalar aparılarkən gecikmələrin davam edəcəyi bildirilib. Sərnişinlərə alternativ marşrutlardan istifadə etmələri tövsiyə olunub.
