İsrail ordusunun son 4 gün ərzində mühasirə altındakı Qəzzaya endirdiyi zərbələr nəticəsində 118 fələstinli həyatını itirib.

Bu barədə Qəzzadakı hökumətin media ofisinin yaydığı məlumatda bildirilib.

“İsrail qüvvələri prezident Donald Trampın atəşkəs çağırışına baxmayaraq Qəzza zolağındakı fələstinlilərə qarşı hücumlarını davam etdirir”, – məlumatda qeyd olunub.

Bəyanatda bildirilir ki, İsrail oktyabrın 4-dən 7-dək bölgəyə 230-dan çox hava zərbəsi endirib. Hücumlarda həlak olan 118 mülki şəxs arasında qadın və uşaqlar da var. Təkcə Qəzza şəhərində 72 nəfərin öldürüldüyü bildirilir.

Bəyanatda hücumlara görə tamamilə İsrailin məsuliyyət daşıdığı vurğulanıb və ABŞ administrasiyası ilə beynəlxalq ictimaiyyətə hücumların dayandırılması üçün ciddi, təsirli və təcili addımlar atması ilə bağlı çağırış edilib.

Donald Tramp Fələstinin müqavimət təşkilatı “Həmas”ın atəşkəs təklifinə müsbət cavab verməsindən sonra İsraili bombardmanları dərhal dayandırmağa çağırıb.

Rəsmi “Truth Social” platformasında paylaşım edən Donald Tramp atəşkəs danışıqlarının “müsbət” və “sürətlə irəlilədiyini” bildirib.

İsrail və “Həmas” Misir və Qətərin vasitəçiliyi ilə Şarm əl-Şeyxdə dolayı danışıqları bərpa edib.

Misirin xarici işlər naziri Bədr Abdulati çərşənbə axşamı bildirib ki, danışıqların məqsədi əsir mübadiləsi üçün əlverişli şərait yaratmaq və Qəzzaya humanitar yardımın məhdudiyyətsiz daxil olmasını təmin etməkdir.

İsrail indiyədək Qəzzada əksəriyyəti qadın və uşaq olmaqla 67 100-dən çox fələstinlini qətlə yetirib.

İsrail mühasirəyə alınmış ərazinin böyük hissəsini viran qoyub və demək olar ki, bütün əhalini köçkün vəziyyətinə salıb.