Rusiyanın İnsan Hüquqları üzrə ombudsmanı Tatyana Moskalkova yanvarın 19-a verdiyi açıqlamada Ukrayna parlamentinin insan hüquqları üzrə müvəkkili Dmitro Lubinets ilə keçirdiyi görüşdə hərbi əsir mübadilələrinin təcili şəkildə yenidən başlanması məsələsini müzakirə etdiyini bildirib.
T.Moskalkova “Telegram” üzərindən paylaşımında dörd aydan artıq müddətdə heç bir əsir mübadiləsinin baş tutmadığını qeyd edib.
Rusiyanın Ombudsmanından bildirilib ki, Ukrayna Ali Radasının (parlamenti) ombudsmanı Dmitro Lubinets ilə keçirilən görüşdə dörd aydır mübadilənin aparılmaması səbəbindən əsir dəyişiminin qarşısındakı maneələrin prinsipial olaraq təcili aradan qaldırılması məsələsini gündəmə gətirib.
T.Moskalkova görüşün dəqiq harada və nə vaxt baş tutduğunu açıqlamayıb. Lakin həm T.Moskalkova, həm də D.Lubinets yanvarın 16-da “Telegram” kanallarında Cenevrədə olduqlarını və Beynəlxalq Qızıl Xaç Komitəsinin prezidenti Miriana Spoliariçin qurumun baş qərargahında hər iki rəsmi ilə ayrı-ayrılıqda görüşdüyünü bildirmişdilər.
T.Moskalkova Rusiyanın Müdafiə Nazirliyinin mübadilə prosesi üçün dəfələrlə müxtəlif formatlar təklif etdiyini, lakin Ukrayna tərəfinin müvafiq qərarların qəbulunu gecikdirdiyini iddia edib.
“Analar və həyat yoldaşları sevdiklərini nigaranlıq içində gözləyirlər. Onların bir an əvvəl evlərinə qayıtması humanizm və mərhəmət nümunəsi olacaq”, – deyən rusiyalı ombudsman, ukraynalı həmkarına Rusiyada saxlanılan və mübadilə çərçivəsində yaxın vaxtlarda azad edilə biləcək ukraynalı hərbçilərin siyahısını təqdim etdiyini də əlavə edib.
T.Moskalkova “Ukrayna tərəfinin təkliflərini gözləyirik” deyərək, Cenevrə Konvensiyasına əsasən yaralı rusiyalı əsirlərin də ölkələrinə qaytarılmalı olduğunu vurğulayıb.
Qeyd edək ki, hər iki tərəfdən 185 nəfərin geri qaytarıldığı son əsir mübadiləsi oktyabr ayında baş tutmuşdu. Əsir mübadiləsinə dair ilkin razılaşmalar İstanbulda keçirilən Rusiya–Ukrayna danışıqları zamanı əldə edilmişdi.
Tərəflər arasında aparılan üç raund danışıqların nəticəsi olaraq “1 000-ə 1 000” formatında mübadilə, digər genişmiqyaslı mübadilə planı, həlak olmuş hərbçilərin nəşlərinin qarşılıqlı təhvil verilməsi və hər iki tərəfdən təxminən 1.200 əsirin geri qaytarılmasını nəzərdə tutan razılaşmalar imzalanmışdı.
