İran və ABŞ bu gün Romada Tehranın sürətlə inkişaf edən nüvə proqramı ilə bağlı danışıqların beşinci raunduna başlamağa hazırlaşır.
Danışıqlarda ABŞ-ı Prezident Donald Trampın xüsusi nümayəndəsi Stiv Vitkof və Dövlət Departamentinin siyasi planlaşdırma üzrə direktoru Maykl Anton təmsil edəcək. Rəsmilər danışıqların hansı məkanda keçiriləcəyinə dair açıqlama verməyiblər.
Omanın xarici işlər naziri Bədr Əl Busaidi danışıqlara vasitəçilik edir, çünki Ərəbistan Yarımadası ölkəsi həm Tehran, həm də Vaşinqton tərəfindən etibarlı həmsöhbət kimi qəbul edilir.
Danışıqlarda müzakirə olunacaq əsas mövzulardan biri uranın zənginləşdirilməsi olacaq. Danışıqların məqsədi, ABŞ-ın İrana qarşı tətbiq etdiyi və yarım əsrlik düşmənçiliyi sona çatdıran bəzi sərt iqtisadi sanksiyaların ləğvi müqabilində İranın nüvə proqramını məhdudlaşdırmaqdır.
ABŞ Prezidenti Donald Trump razılaşma əldə edilmədiyi təqdirdə İranın nüvə proqramını hədəf alacaq hava hücumları həyata keçirəcəyini dəfələrlə vurğulamışdı.
Uranın zənginləşdirilməsi məsələsi hələ də əsas problem olaraq qalır. Stiv Vitkof əvvəlcə İranın uranı 3,67 faiz zənginləşdirməsini təklif etmişdi, lakin sonradan İranın bütün zənginləşdirmə fəaliyyətinin dayandırılmasının lazım olduğunu bildirdi. Amerika tərəfinin bu mövqeyi zamanla daha sərt bir xəttə çevrilib.
Jurnalistlərin danışıqlarla bağlı suallarını cavablandıran ABŞ Dövlət Departamentinin sözçüsü Tami Brus bdeyib: "Biz uğur qazanacağımıza inanırıq. İranlılar bu masadadırlar, buna görə də bizim mövqeyimizin nə olduğunu anlayırlar".
