İki ölkə arasında keçən həftə qəbul edilən sülh sazişi layihəsi ilə bağlı razılaşma onilliklərdir davam edən münaqişəyə son qoyulması istiqamətində mühüm addım kimi qiymətləndirilir.

Bu barədə Ermənistanın Baş naziri Nikol Paşinyan “X” sosial şəbəkəsində paylaşım edib.

"Ermənistan və Azərbaycan arasında sülh sazişinin layihəsi razılaşdırılıb və imzalanmağı gözləyir. Mən razılaşdırılmış sənədi imzalamağa hazıram", - o yazıb.

Paşinyanın bəyanatı ötən cümə axşamı Azərbaycan və Ermənistanın ayrı-ayrılıqda verdiyi açıqlamalardan sonra verilib. Tərəflər Bakı ilə İrəvan arasında on illərdir davam edən münaqişəyə son qoymaq və diplomatik münasibətlər qurmaq məqsədi daşıyan sülh sazişi layihəsi üzərində razılaşdıqlarını bəyan ediblər.

Qeyd edək ki, iki keçmiş sovet respublikası arasında münasibətlər 1991-ci ildə Ermənistanın beynəlxalq səviyyədə Azərbaycan ərazisi kimi tanınan Qarabağı və ətraf yeddi rayonu işğal etməsi ilə gərginləşib.

Azərbaycan 2020-ci ilin payızında 44 günlük müharibədə bu rayonların əksəriyyətini azad etdi və Rusiyanın vasitəçiliyi ilə əldə edilən sülh sazişi normallaşma və sərhədlərin demarkasiyası danışıqlarına gətirib çıxardı.

2023-cü ilin sentyabrında Azərbaycan bölgədəki separatçı qüvvələrin təslim olması ilə Qarabağda tam suverenliyə nail oldu.