İsrailin ictimai yayım orqanı ‘‘Kan’’-ın yaydığı məlumata görə, dörd girovun cəsədinin geri qaytarılmasından sonra İsrail Qəzza ilə Misir arasındakı Rəfah sərhəd-keçid məntəqəsini açmaq və bölgəyə humanitar yardımın çatdırılmasına icazə vermək qərarına gəlib.

Xəbərdə həmçinin qeyd olunur ki, İsrail "Həmas"a qarşı planlaşdırdığı bəzi tədbirləri dayandırıb.

Rəfah sərhəd-keçid məntəqəsinin bağlı saxlanılması ilə bağlı qərar "Həmas"ın ABŞ-ın vasitəçiliyi ilə təklif olunan atəşkəs razılaşması çərçivəsində girovların cəsədlərini təhvil verməkdən imtina etməsi və onların yerini müəyyən etməyin çətin olduğunu iddia etməsindən sonra verilmişdi.

İsrail humanitar yardımın BMT və bölgədə fəaliyyət göstərən yardım təşkilatları tərəfindən paylanmasını tələb edir.

BMT-nin Uşaq Fondu – UNICEF-in sözçüsü Rikardo Pires bildirib:
"Bütün sərhəd-keçid məntəqələri açıq olmalıdır. Rəfah keçidi bağlı qaldıqsa, xüsusilə cənub bölgələrindəki köçkünlər üçün ağrı-acılar və çətinliklər davam edəcək."

ABŞ prezidenti Donald Tramp oktyabrın 13-də bəyan edib ki, İsrail Qəzzaya qarşı müharibəni dayandırıb.Tərəflər arasında həyata keçirilən əsir mübadiləsi bölgəyə humanitar yardımların daha sürətli çatdırılacağına dair ümidləri artırıb. Qlobal Aclığa Nəzarət Təşkilatı yüz minlərlə insanın aclıq təhlükəsi ilə üz-üzə qaldığını bildirib.

Beynəlxalq Qızıl Xaç Komitəsinin (BQXK) sözçüsü Kristian Kardon isə çərşənbə axşamı Cenevrədə keçirdiyi mətbuat konfransında deyib:
"Hazırda bölgəyə cəmi bir neçə yük maşını daxil olub. Yardımların boşaldıldığı ərazilərdə yaranan izdiham isə humanitar standartlara uyğun olmayan davranışlar sərgiləyir."

BMT-nin Ümumdünya Ərzaq Proqramı (ÜƏP) da çərşənbə axşamı açıqlama yayaraq bildirib ki, həftə sonundan bu yana Qəzzaya 137 yardım yük maşını daxil olub. Yardım təşkilatları, bölgədə uzun müddətdir yardım ala bilməyən təxminən 400 min nəfərə təcili humanitar yardım ləvazimatlarının çatdırılmasını hədəfləyir.