Türkiyə Prezidenti Administrasiyasının İctimaiyyətlə Əlaqələr İdarəsinin rəhbəri Burhanəddin Duran Təl-Əviv rəhbərliyinin işğal altındakı İordan çayının qərb sahilindəki müəyyən əraziləri İsrailin "dövlət mülkiyyətinə" keçirmək qərarını qətiyyətlə pisləyib.
B. Duran bu addımı beynəlxalq hüququn kobud şəkildə pozulması kimi qiymətləndirərək bildirib ki, bu qərar bəşəriyyətin ümumi vicdanına ziddir və soyqırım siyasətinin davam etdiyini göstərir. O, bu növ təşəbbüslərin bölgədəki ədalətsizliyi dərinləşdirdiyini və sülh, regional sabitlik və təhlükəsizlik ümidlərini qəsdən hədəf aldığını vurğulayıb.
‘‘Fələstin xalqının tarixi və qanuni hüquqlarını görməzdən gələn, bölgənin demoqrafik və hüquqi strukturunu dəyişdirməyi hədəfləyən bu yanaşma, davamlı sabitliyin qarşısındakı ən böyük maneələrdən biri olacaq’’,-deyə Burhanəddin Duran vurğulayıb.
B.Duran rəsmi sosial media hesabında etdiyi paylaşımda Fələstin torpaqlarının hər hansı formada ələ keçirilməsini qəbul etmədiklərini bildirib. O, beynəlxalq ictimaiyyəti bu qanunsuzluğun qarşısını almağa və iki dövlətli həll modelinə əsaslanan davamlı sülh üçün məsuliyyət daşımağa çağırıb.
‘‘Prezident Rəcəb Tayyib Ərdoğanın rəhbərliyi altında beynəlxalq hüquqa və insan haqlarına əsaslanan ədalətli həll yolu uğrunda mübarizə aparmağa, fələstinli qardaşlarımızın haqlı mübarizəsini dəstəkləməyə davam edəcəyik’’,-deyə B.Duran qeyd edib.
Bu bəyanat İsrail hökumətinin İordan çayının qərb sahilindəki Fələstin ərazilərini “dövlət mülkiyyəti” kimi qeydiyyata almaq təklifini təsdiqləməsindən sonra verilib. İsrail dövlət televiziyasının məlumatına görə, sözügedən təklif maliyyə naziri Bezalel Smotriç, ədliyyə naziri Yariv Levin və müdafiə naziri İsrael Katz tərəfindən irəli sürülüb.
Fələstin tərəfi bu addımları İordan çayının qərb sahilinin rəsmi ilhaqına hazırlıq və BMT tərəfindən dəstəklənən iki dövlətli həll prosesinin tamamilə iflic edilməsi kimi qiymətləndirir.
