Avropa Komissiyasının sədri Ursula fon der Leyen və ABŞ prezidenti Donald Tramp Ukrayna müharibəsi ilə bağlı Rusiyaya təzyiqin artırılmasını müzakirə ediblər.

Avropa Komissiyasının sədri Ursula fon der Leyen ABŞ prezidenti Donald Trampla Ukrayna müharibəsi ilə bağlı Rusiyaya qarşı təzyiqin artırılması üçün əlavə addımların atılması məsələsini müzakirə etdiklərini açıqlayıb.

Rəsmi “X” sosial media hesabında paylaşım edən Ursula fon der Leyen deyib:
“Donald Trampla iqtisadi təzyiqi gücləndirmək üçün birgə səylərimizi artırmağı müzakirə etdik’’.

Ursula fon der Leyen bildirib ki, Avropa İttifaqı Komissiyası Rusiyaya qarşı 19-cu sanksiyalar paketini tezliklə təqdim edəcək. Yeni paket kriptovalyutalar, banklar və enerji sektorunu hədəf alan tədbirləri əhatə edəcək.

Qeyd edək ki, Avropa İttifaqı Kremlin 2022-ci ildə Ukraynaya hücumundan sonra Rusiya neftinin böyük hissəsinin idxalına qadağa qoyub və 2027-ci ilin sonuna qədər Rusiyadan neft və qaz idxalını tamamilə dayandırmağı planlaşdırır.

Ursula fon der Leyen Brüsselin daha sürətli hərəkət etməyi hədəflədiyini vurğulayaraq deyib: “Rusiyanın qalıq yanacaq gəlirləri ilə dəstəklənən müharibə iqtisadiyyatı Ukraynada tökülən qanı maliyyələşdirir. Buna son qoymaq üçün Avropa Komissiyası Rusiyanın qalıq yanacaq idxalının mərhələli şəkildə dayandırılmasını sürətləndirməyi təklif edəcək’’.