Rusiya prezidentinin iqtisadi məsələlər üzrə xüsusi nümayəndəsi Kiril Dmitriyev rəsmi Moskva və Vaşinqton rəhbərliyinin Berinq boğazının altından tunel inşa edərək iki ölkəni bir-birinə bağlamaq mövzusunda danışıqlara başladığını bəyan edib. Bu barədə K.Dmitriyev oktyabrın 17-də “X” platformasında etdiyi paylaşımda bildirib.

ABŞ prezidenti Donald Tramp da eyni tarixdə Ağ Evdə Ukrayna prezidenti Volodimir Zelenski ilə görüşündə məsələylə bağlı fikir bildirərək Rusiya ilə ABŞ-ı dəmir yolu daşımacılığı vasitəsilə birləşdirəcək Berinq boğazının altındakı tunel layihəsini “maraqlı fikir” adlandırıb.

Eyni zamanda Rusiya İnvestisiya Fondunun (RDIF) rəhbəri olan K.Dmitriyev qeyd edib ki, müasir bir tunelin inşası səkkiz ildən az müddətdə başa çatdırıla bilər və bu lahiyə təxminən 8 milyard dollara başa gələcək.

Layihəyə “Putin-Tramp Tuneli” adını verən K.Dmitriyev bu təşəbbüsün ortaq resursların inkişafı, yeni iş yerlərinin yaradılması və iqtisadi artım potensialına diqqət çəkib.

K.Dmitriyev əlavə edib ki, Rusiya İnvestisiya Fondu RDIF daha əvvəl Rusiya ilə Çin arasında sərhədyanı dəmir yolu körpülərinin inşasında olduğu kimi, bu sahədə də təcrübəyə malikdir.