Rusiya Təhlükəsizlik Şurası sədrinin müavini Dmitri Medvedev Qələbə Günü ərəfəsində verdiyi açıqlamada Almaniyanın hərbi gücünü artırmasının “intiqamçılıq niyyəti”ndən xəbər verdiyini iddia edib.

D.Medvedev Almaniya hökumətini “intiqam ambisiyaları” ilə hərəkət etməkdə və İkinci Dünya müharibəsinin nəticələrini yenidən nəzərdən keçirməyə çalışmaqda günahlandırıb.

D.Medvedev Rusiyanın Qələbə Günü ərəfəsində RT saytında dərc olunan məqaləsində Almaniya rəsmilərinin açıqlama və siyasətlərinə istinad edərək bildirib ki, bu açıqlamalar və addımlar Berlin rəhbərliyinin həmin niyyətlərini ortaya qoyur.

D.Medvedev Almaniyanın heç vaxt həqiqi mənada “nasizmdən təmizlənmə” prosesindən keçmədiyini irəli sürüb. Onun sözlərinə görə, keçmiş nasist partiyası üzvləri müharibədən sonra ölkənin dövlət qulluğu sisteminin bir hissəsinə çevriliblər.

D.Medvedev bildirib ki, Almaniya rəsmiləri artıq Rusiyanı “təhlükəsizlik və sülh üçün əsas təhdid” kimi təqdim edir. Onun sözlərinə görə, Berlin rəhbərliyi rəsmi Moskvanı “strateji məğlubiyyət”ə məruz qoymağı hədəfləyən xətt üzrə hərəkət edir.

D.Medvedevin məqaləsində bu ifadələrə yer verilib: “Əcdadları İkinci Dünya müharibəsində Şərq cəbhəsində Sovet İttifaqına qarşı qəddar şəkildə döyüşmüş bəzi rusofoblar bu gün “ruslara müharibədə məğlubiyyətin nə olduğunu göstərmək” çağırışları edirlər. Başqa sözlə, genişmiqyaslı revanşist strategiya artıq rəsmən qəbul edilib”.

O, həmçinin Almaniyada 2029-cu ilədək Rusiya ilə hərbi qarşıdurma ehtimalı barədə aparılan siyasi müzakirələrə diqqət çəkib.

D.Medvedev Berlin rəhbərliyinin Almaniya ordusunu “Avropanın ən güclü ordusu”na çevirməyə çalışdığını bildirib. Onun sözlərinə görə, Almaniya şəxsi heyətin sayını 181 mindən 460 minə çatdırmağı hədəfləyir.

D.Medvedev sözlərini Almaniya qarşısında iki seçim olduğunu bildirməklə tamamlayıb. O, bu seçimləri müharibə və dövlətin məhvi, yaxud dialoqa qayıdış kimi təqdim edib.

“Hər iki nəticəni də qəbul edə bilərik. Növbəti addım Almaniyadan asılıdır”, – deyə D.Medvedev yazıb.