Türkiyənin xarici işlər naziri Hakan Fidan Türkiyə-Yunanıstan münasibətlərini qiymətləndirib. O, Türkiyənin yaxşı qonşuluq münasibətlərini qorumaq istədiyini və Yunanıstanın regionu sabitsizləşdirmək və xaosa sürükləmək istəyənlərin alətinə çevrilməsini istəmədiklərini bildirib.

Adaların silahlandırılması məsələsinə toxunan Hakan Fidan Türkiyənin ciddi narahatlıqlarını diqqətə çatdırıb.

‘‘Adaların hərbiləşdirilməməsi barədə statusunun pozulması bizim üçün təhdiddir. Əlbəttə, orada seçki prosesi var. Ancaq onlara öz mövqeyimizi açıq şəkildə çatdırmışıq’’,-deyə Hakan Fidan vurğulayıb.

Nazir bildirib ki, Yunanıstanın beynəlxalq müqavilələrlə silahsızlaşdırılmış statusa malik adalar üzrə öhdəliklərini pozmaq səyləri 1960-cı ildən bəri davam edir. Nazir Türkiyənin bu dövrdən etibarən ikitərəfli kanallar, NATO və BMT vasitəsilə etirazlarını çatdırdığını qeyd edib.

‘‘Qonşumuz və müttəfiqimiz Yunanıstanı müqavilə çərçivəsindəki öhdəliklərini yerinə yetirməyə dəvət edirik’’,-deyə Hakan Fidan vurğulayıb.