Türkiyənin xarici işlər naziri Hakan Fidan oktyabrın 17-də almaniyalı həmkarı Yohann Vadeful ilə birgə mətbuat konfransı keçirib. Nazir H.Fidan çıxışı sırasında deyib: “Türkiyə dövləti Qəzza üçün bir nəfəs və Fələstin üçün bir ümid olmağa davam edəcək. Qəzzanın yenidən inşasına yönəlik səylərə də aktiv dəstək verməyi sürdürcəyik. Qəzzada ucalacaq hər bina bəşəriyyətin ortaq vicdanının əsəri olacaq. Biz hələ yolun çox başlanğıcındayıq. Bizim yekun məqsədimiz iki dövlətli həllin həyata keçirilməsi və bütün bu baş verən qarşıdurmalara baxmayaraq sülh və rifahın hökm sürəcəyi bir Orta Şərqin qurulmasıdır”.
Atəşkəsin əldə olunmasının dərhal ardından rəsmi Ankaranın yardım səylərini artırdığını bildirən H.Fidan, Qəzzadakı humanitar yardımın uzunmüddətli və sistemli olmasının vacibliyini vurğulayıb.
Türkiyənin xarici işlər naziri qeyd edib ki, Almaniyanın xarici işlər naziri Y.Vadeful ilə keçirilən görüşlərdə rəsmi Ankara və Berlin rəhbərliyi Qəzzada atəşkəsin davam etməsi, humanitar yardımın ehtiyacı olanlara fasiləsiz çatdırılması və müharibənin qalıcı şəkildə sona çatması gözləntilərini təsdiqləyiblər.
Sülhün bərqərar olması
Türkiyəli nazir bölgədə daimi sülhün qurulması üçün iki dövlətli həllin həyata keçirilməsinin zəruriliyini bildirib.
H.Fidan Avropa ölkələrinin, xüsusilə də Almaniyanın, Fələstin məsələləri və Qəzza ilə bağlı atacağı konstruktiv addımların əhəmiyyətinə diqqət çəkərək deyib: “Türkiyə əldə olunan razılaşmanın icrasına yönəlik üzərinə düşəni etdiyi kimi, bundan sonrasında da artıqlaması ilə etməyə hazırdır”.
Hakan Fidan bu çərçivədə prezident Rəcəb Tayyib Ərdoğanın beynəlxalq sabitlik kimi mövzularda ortaya qoyduğu iradənin mövcud olduğunu da vurğulayıb.
