ABŞ dövlət katibi Marko Rubio Azərbaycan və Ermənistan arasında sülh sazişinin tezliklə əldə olunacağına ümid etdiyini bildirib.
O, bu fikri Ağ Evdə Prezident Donald Trampla birgə keçirilən iclas zamanı səsləndirib.
İki keçmiş sovet respublikası arasında münasibətlər 1991-ci ildə Ermənistan ordusunun beynəlxalq aləmdə Azərbaycanın bir hissəsi kimi tanınan Qarabağ və ətrafındakı yeddi rayonu işğal etməsi ilə kəskinləşib.
Bu ərazilərin əksəriyyəti 2020-ci ilin payızında baş vermiş 44 günlük müharibə zamanı Azərbaycan tərəfindən azad olunub. Müharibə Rusiyanın vasitəçiliyi ilə əldə edilən və normallaşma, eləcə də sərhədlərin demarkasiyası üzrə danışıqlara yol açan sülh razılaşması ilə başa çatıb.
2023-cü ilin sentyabrında bölgədəki separatçı qüvvələrin təslim olmasından sonra Azərbaycan Qarabağ üzərində tam suverenliyini bərpa edib.
