ABŞ prezidenti Donald Trampın xüsusi nümayəndəsi Stiv Uitkoffun Ukraynadakı müharibəyə son qoymağı hədəfləyən yenilənmiş sülh planını təqdim etmək üçün Sankt-Peterburqda Rusiya prezidenti Vladimir Putinlə görüşəcəyi gözlənilir.
"Axios" nəşrinin anonim ABŞ rəsmisinə istinadən yaydığı məlumata görə, görüşdə Vladimir Putinə müharibəni bitirəcək yeni təkliflər paketi təqdim olunacaq. ABŞ rəsmisi bu təklifin üçtərəfli və çoxtərəfli danışıqlara yol açacağına ümid etdiklərini bildirib. Görüşə Cared Kuşnerin də onlayn qaydada qoşulacağı bildirilir.
Məlumata görə, Stiv Uitkoff dünən Osloda Ukrayna Prezidenti Volodimir Zelenski, Norveçin Baş naziri Yonas Qar Störe, eləcə də E4 ölkələri (Böyük Britaniya, Fransa, Almaniya, Polşa), Aİ və NATO nümayəndələri ilə görüş keçirib. Görüşdə Ukrayna tərəfi yeni təkliflər irəli sürüb və çərçivə sazişinin hazırlanması istiqamətində konsensus əldə olunub.
Məsələyə münasibət bildirən ABŞ Prezidenti Donald Tramp Zelenskinin Rusiya ilə razılığa gəlməli olduğunu vurğulayıb. Donald Tramp deyib: "Ukraynaya həm ABŞ, həm də Avropa böyük vəsait ayırıb. Artıq Avropa bundan yorulub"
