Fransanın xarici işlər naziri bazar ertəsi verdiyi bəyanatda bildirib ki, Əlcəzair hökuməti 12 fransız diplomata ölkəni 48 saat ərzində tərk etmələri üçün ultimatum verib. Bu qərarın, Fransada bir əlcəzair vətəndaşının saxlanılması ilə bağlı olduğu qeyd olunub.
Fransanın xarici işlər naziri Jan-Noel Barrot deyib:“Əlcəzair hakimiyyətini bu deportasiya tədbirlərindən imtina etməyə çağırıram. Əgər bu qərarda israr edərlərsə, biz də adekvat cavab vermək məcburiyyətində qalacağıq.”
Diplomatik mənbənin AFP agentliyinə verdiyi məlumata görə, deportasiyaya məruz qalanlar arasında Fransa Daxili İşlər Nazirliyinin bir neçə əməkdaşı da var.
Fransa prokurorları 2024-cü ilin aprelində Paris ətrafında baş vermiş oğurluq hadisəsi ilə bağlı aralarında bir konsulluq əməkdaşının da olduğu üç əlcəzairlini günahlandırır. Onlar, əlcəzairli Amir Buxorsun oğurlanmasında iştirak etməkdə ittiham edilirlər.
Bu hadisə Əlcəzair ilə Fransa arasında münasibətlərin həssas dövrünə təsadüf edir. Əlcəzair isə bu ittihamların iki ölkə arasındakı münasibətləri yaxşılaşdırmaq cəhdlərini pozmaq məqsədi daşıdığını iddia edir.
“Amir DZ” adı ilə tanınan Amir Buxorsun TikTok platformasında bir milyondan çox izləyicisi var. O, 2016-cı ildən Fransada yaşayır və 2023-cü ildə siyasi sığınacaq alıb. Vəkilinin sözlərinə görə, Buxors 2024-cü ilin aprel ayında qaçırılıb və ertəsi gün azadlığa buraxılıb.
Əlcəzair hökuməti onu fırıldaqçılıq və terrorizm ittihamları ilə axtarır və Fransadan ekstradisiyasını tələb edir. Fransa isə Əlcəzairi 12 diplomatın deportasiyasını dərhal dayandırmağa çağırıb və bu qərarın qüvvədə qalacağı təqdirdə cavab tədbirlər görəcəyi ilə bağlı xəbərdarlıq edib.
