Səudiyyə Ərəbistanının vəliəhd şəhzadəsi Məhəmməd bin Salman Fransaya rəsmi səfəri çərçivəsində Fransa prezidenti Emmanuel Makronla bir araya gəlib.
Görüş çərçivəsində ölkə başçıları Səudiyyə Ərəbistanı-Fransa Strateji Tərəfdaşlıq Şurasının ilk iclasına da həmsədrlik ediblər.
Hər iki lider regional sabitliklə bağlı dövlət suverenliyinə, beynəlxalq hüquqa və diplomatik həll yollarına əsaslanan ortaq yanaşmanı vurğulayıb. Birgə bəyanat verən dövlət başçıları Fələstinin dövlət quruculuğunu dəstəkləməyə davam etdiklərini həmçinin İsrailin bütün Livan ərazisindən çıxmasını tələb ediblər.
Yaxın Şərq diplomatiyası
Ər-Riyad rəhbərliyi və rəsmi Paris İsrailin Fələstin məsələsində 1967-ci il sərhədləri daxilində müstəqil dövlət qurmaq hüququnu zəiflətmək cəhdlərinə qətiyyətlə etiraz ediblər. Onlar qanunsuz İsrail məskunlaşma siyasətinə və qeyri-qanuni israilli köçkünlərin törətdiyi zorakılığa son qoyulmasını tələb ediblər.
Tərəflər, həmçinin Qəzzada davamlı atəşkəsi mümkün edəcək şəraitin yaradılmasına çağırış ediblər. Bölgəyə maneəsiz humanitar yardımın çatdırılmasını tələb ediblər.
Bununla yanaşı Livan məsələsində də hər iki ölkə yekun həll yoluna yönəlmiş səyləri artırmaq barədə razılığa gəlib. BMT Təhlükəsizlik Şurasının 1701 saylı qətnaməsinin tam icrasını tələb ediblər. Eyni zamanda, dövlət qulluqçularının xarixindəki silahlı qrupların tərksilah edilməsini və İsrailin bütün Livan ərazisindən çıxmasını istəyiblər.
İran məsələsində hər iki tərəf Tehran hakimiyyətinin nüvə proqramı ilə bağlı danışıqlar yolu ilə həllin vacibliyini vurğulayıb. Onlar İranı Beynəlxalq Atom Enerjisi Agentliyi ilə əməkdaşlığı bərpa etməyə çağırıblar.
Suriya mövzusuna da toxunan liderlər ölkənin sabitliyinə və iqtisadi dirçəlişinə sadiq olduqlarını ifadə ediblər. Onlar birgə Səudiyyə Ərəbistanı-Suriya-Fransa İş Şurasının yaradılmasını məmnunluqla qarşılayıblar.
