Almaniyanın Münxen hava limanı bir neçə pilotsuz uçuş aparatı ilə bağlı bir gecədə bağlanıb,bu gün uçuşları bərpa edib. Bu hadisə Avropada aviasiya xətaları silsiləsinin sonuncusu olub.
Danimarka, Norveç və Polşa hava limanları naməlum dronlara görə son vaxtlar uçuşları dayandırıb, Rumıniya və Estoniya isə bu hadisələrdə Rusiyanı günahlandırıb, Rusiya bunu təkzib edib.
Münxen hava limanı oktyabrın 2-də gecə radələrində bir neçə pilotsuz uçuş aparatının müşahidə edilməsindən sonra hava məkanını bağlayan son hava limanı olub. Bu, 30-dan çox reysin ləğvi və ya marşrutunun dəyişdirilməsi və təxminən 3000 sərnişinin narahatlığı ilə nəticələnib.
Uçuşlar bu gün (3 oktbar) səhər tezdən bərpa edilib və uçuş izləmə saytları təyyarələrin yerli vaxtla 05:50-də (GMT 0350) hava limanından ayrıldığını göstərib.
Almaniyanın bayraq daşıyıcısı "Lufthansa"nın sözçüsü "Uçuş əməliyyatları planlaşdırıldığı kimi bərpa edildi" deyib.
"Hava limanının bağlanması ilə əlaqədar olaraq "Lufthansa"nın 19 reysi ləğv edilib və ya istiqaməti dəyişdirilib", - sözçü əlavə edib.
Polis sözçüsü AFP-yə bildirib ki, bir neçə nəfər bu gün GMT ilə saat 19.30 radələrində və bir saat sonra hava limanı ətrafında pilotsuz uçuş aparatları görüb və nəticədə hər iki uçuş-enmə zolağı bir saatlıq bağlanıb.
Hava limanı zərər çəkmiş sərnişinlərə düşərgə çarpayıları, ədyallar, içkilər və qəlyanaltılar təklif edib.
Almaniya hakimiyyəti pilotsuz təyyarələrin mənbəyini müəyyən etmək üçün araşdırmalara başlayıb. Hadisə yerinə polis helikopterləri cəlb edilib, lakin pilotsuz uçuş aparatlarının növü və sayı barədə məlumat yoxdur.
Hadisə milli bayram olan Alman Birlik Gününün və hər gün yüz minlərlə insanın Münxenə toplaşdığı Oktoberfestin bitməsinə az qalmış baş verib.
İllik qala və əyləncə yarmarkası oktyabrın 1-də bomba təhlükəsi səbəbindən yarım gün bağlanıb.
"Dron divarı"
Danimarkada qeydə alınan uçuş aparatları və Moskvanın Estoniya və Polşada hava məkanını pozması Rusiyanın Ukraynaya qarşı təcavüzünün Avropa sərhədlərindən kənara çıxa biləcəyi ilə bağlı qorxuları artırıb.
Ukrayna prezidenti Volodimir Zelenski Avropaya xəbərdarlıq edib ki, son dron hücumları Moskvanın təcavüzündə “gərginliyi artırmağı” planlaşdırdığını göstərir.
Keçən həftə bir çox dronların ölkə boyu, o cümlədən hərbi və sənaye əraziləri üzərində uçmasından sonra Almaniya özünü yüksək hazırlıq vəziyyətində elan etdi. Daxili işlər naziri Aleksandr Dobrindt deyib ki, Berlin bu hibrid təhlükəyə "yeni cavablar tapmalıdır", buna pilotsuz aparatlarının vurulması da daxildir.
Danimarka da yüksək hazırlıq vəziyyətinə gətirilib, Baş nazir Mette Frederiksen keçən həftə Rusiyanın Avropa təhlükəsizliyinə təhdid yaradan yeganə ölkə olduğunu təkrarlayıb.
Moskva "qəti şəkildə" hər hansı əlaqəni inkar edir, Rusiya prezidenti Vladimir Putin isə Avropanı artan hərbi xərcləri əsaslandırmaq üçün "isteriya" yaratmaqda günahlandırır.
Aİ dövlət başçıları bu həftə Kopenhagendə bir araya gələrək blokun müdafiəsinin gücləndirilməsini, o cümlədən “dron divarı”nın yaradılmasını müzakirə ediblər. Danimarka Stokholmun görüşün fasiləsiz davam etməsini təmin etmək üçün dron əleyhinə texnologiyasından istifadə etmək təklifini qəbul edib.
Danimarka Müdafiə Nazirliyi ABŞ-ın Danimarkaya pilotsuz uçuş aparatlarına qarşı müdafiə mexanizmləri göndərdiyini təsdiqləyib.
NATO hava məkanının pozulmasından sonra Baltikyanı bölgədə "yüksək həyəcan siqnalı"na keçdiyini açıqlayıb.
