Livan ordusunun hərbi birləşmələri ABŞ-nin vasitəçiliyi ilə hazırlanan və ölkənin cənubunda dövlət nəzarətini bərpa etməyi hədəfləyən plan çərçivəsində İsrail qüvvələrinin geri çəkilməsinin ardından Zevtar əl-Qərbiyyə qəsəbəsinə daxil olub.
Livanın təhlükəsizlik rəsmisinin verdiyi məlumata görə, İsrail işğalçı qüvvələrinin ərazini tərk etməsindən sonra Livan ordusunun hissələri ölkənin cənubunda yerləşən Zevtar əl-Qərbiyyə yaşayış məntəqəsinə yerləşdirilməyə başlayıb.
Bu addım Livan Prezidenti Cozef Aunun Vaşinqtona səfəri fonunda atılıb. Səfər çərçivəsində ABŞ tərəfi İsraillə müvafiq razılıq əldə edildiyini bildirib.
Livan ordusunun yaydığı bəyanatda deyilib: "Hərbi bölmələrimiz bu səhər saatlarından etibarən Nəbatiyyə bölgəsindəki Zevtar əl-Qərbiyyə qəsəbəsinə yerləşdirilməyə başlayıb".
İsrail ordusu iyulun 20-də "pilot bölgə" proqramı adlandırılan planın icrasına başlanıldığını elan etsə də, bu gün (21 iyul 2026) mövzu ilə bağlı əlavə açıqlama verməyib.
Livan Səhiyyə Nazirliyinin son məlumatlarına görə, İsrailin hücumları nəticəsində 4 240-dan çox insan həlak olub, 12 190-dan çox nəfər yaralanıb, 1 milyondan çox dinc sakin isə öz evini tərk edərək didərgin düşüb.
