Fələstinin müqavimət hərəkatı "Həmas" ABŞ prezidenti Donald Trampın Qəzza planı çərçivəsində silahlarını təhvil verməyə razılaşdıqları barədə yayılan xəbərləri təkzib edib.
Daha əvvəl bəzi media orqanlarında yayılan məlumatlarda "Həmas"ın silahlarını beynəlxalq nəzarət altında fəaliyyət göstərən Fələstin-Misir komitəsinə təhvil verməyə razılaşdığı iddia olunmuşdu.
"Həmas"ın yüksək vəzifəli üzvü Mahmud Mərdavi yayılan bu xəbərlərin əsassız olduğunu bildirib.
“Biz atəşkəs danışıqlarının gedişi və 'Həmas'ın silahların təhvil verilməsi barədə bəzi media orqanlarında yayılan uydurma iddiaları qəti şəkildə rədd edirik,” – deyə Mahmud Mərdavi qeyd edib.
Mərdavi yayılan məlumatların "Həmas"ın mövqeyini təhrif etmək və ictimaiyyəti çaşdırmaq məqsədi daşıdığını vurğulayıb.
O, media qurumlarını məlumatları dəqiqləşdirməyə, yalnız etibarlı mənbələrə istinad etməyə çağırıb və jurnalistlərə təsdiqlənməmiş iddialara əsaslanmamağı tövsiyə edib.
Bu gün Misir Trampın Qəzza planı çərçivəsində əsir mübadiləsi sazişinin detalları üzrə danışıqları davam etdirmək üçün "Həmas" və İsrail nümayəndə heyətlərini qəbul edəcək.
Xatırladaq ki, sentyabrın 29-da ABŞ prezidenti Donald Tramp 20 bənddən ibarət olan və İsrail ilə fələstinli əsirlərin azad edilməsi, atəşkəsin əldə olunması, "Həmas"ın tərksilahı və Qəzzanın yenidən qurulmasını əhatə edən planı təqdim etmişdi.
"Həmas" bu planı prinsipcə qəbul etdiyini bildirib və növbəti danışıqların Misirdə keçirilməsi planlaşdırılır.
İsrail bu günə qədər əksəriyyəti qadın və uşaq olmaqla, 67 mindən çox fələstinlini qətlə yetirib. Qəzza zolağının böyük hissəsini xarabalığa çevirən İsrail, demək olar ki, bütün əhalini didərgin salıb.
